NBA-гийн 16 удаагийн аварга “Лейкерс”-ийн удирдлага довтолгооны шугамаа хүчирхэгжүүлэх зорилгоор чөлөөт агент Гилберт Аренастай гэрээ байгуулж магадгүй. “Лейкерс”-ийн холбон тоглогч Деррик Фишер, Стив Блэйк нар энэ улиралд тун тааруу тоглож байгаа. Тиймээс багийн удирдлага өвлийн солилцооны цонхоор холбогчийн байрлалд шинэ хүн нэмж авах магадлалтай байгаа юм. “Нуурууд”-ын төлөөлөгчид ням гаригт Аренасын хувийн бэлтгэл дээр очиж, тоглолтыг нь ажиглажээ. NBA-гийн “Бүх оддын тоглолт”-д гурван удаа оролцож байсан тэрбээр өнгөрсөн арванхоёрдугаар сард “Орландо”-гийн багийн бүрэлдэхүүнээс хасагдсан. Өдгөө 30 настай тэрбээр “Голден Стейт”, “Вашингтон”, “Орландо”-д хүчин зүтгэхдээ дунджаар 21.2 оноо түүж, 4.4 удаа самбараас бөмбөг авч, 5.4 дамжуулалт өгч байв.