УЕПГ-аас өнгөрөгч баасан гаригт Баянгол дүүргийн Эрүүгийн цагдаагийн тасгийн офицер, албан хаагчдыг баривчилсан гэх мэдээллийн дагуу УЕПГ-ын дэргэдэх Мөрдөн байцаах албаны дарга Б.Галдаагаас тодрууллаа.

-Эрүүгийн цагдаагийн тасгийн офицеруудыг авлигын хэргээр саатуулсан гэх мэдээлэл байна. Энэ талаар тодруулахгүй юү?

-Цагдаагийн алба хаагчдыг цагдан хорьсон нь үнэн. Авлигын асуудлаар  шалгах шаардлагатай гэж үзсэн. Гэхдээ Эрүүгийн тасгийн офицер биш. Цагдаагийн ахлагч нар байгаа.

-Хэдэн хүнийг цагдан хорьсон юм бэ?

-Хэд, хэдэн цагдаагийн алба хаагчийг хорьсон байгаа. Тодорхой тоо хэлэх боломжгүй.

Албан бус эх сурвалжийн мэдээллээр цагдаагийн алба хаагчид эрүүгийн гэмт хэргийн холбогдогч нараас их хэмжээний авлига авсан байж болзошгүй хэмээн шалгахаар болж, саатуулаад байгаа гэнэ. Мөн Нийслэлийн прокурорын газрын зөвшөөрлөөр саатуулагдсан алба хаагчдын гэрт нэгжлэг хийжээ. Энэ талаар эргэн мэдээлэх болно.