Аргентины Гадаад хэргийн сайд Их Британийг Өмнөд Атлантын далайд цөмийн шумбагч хөлөг байрлуулсан гэж буруутгажээ. Фолкландын арлын маргаанаас болж дайтаж байсан Аргентин, Их Британийн харилцаа дахин хурцадсан нь хатан хааны тэнгисийн цэрэг тус арал дээр хээрийн сургуулилт явуулж, хунтайж Уилльямыг илгээсэнтэй шууд холбоотой юм. Аргентины Гадаад хэргийн сайд Хектор Тимерманы дээрх шүүмлжлэлийг Их Британи хоосон яриа гэж үзсэн гэнэ. Фолкландын арлыг өөрийн эзэмшлийн газар нутаг гэдэг Аргентин тус арал дээр Их Британийн тэнгисийн цэрэг хээрийн сургуулилт хийж буй эсэргүүцэн НҮБ-д гомдол гаргасан билээ. Харин НҮБ-ын Ерөнхий нарийн бичгийн дарга Бан Ги Мүн хоёр орныг бүс нутагт таагүй байдал үүсэхээс өмнө сөргөлдөөнөөс сэргийлэх арга хэмжээ авахыг уриалжээ. Аргентин Их Британийг цөмийн зэвсэггүй Өмнөд Атлантын далайд цөмийн шумбагч онгоц байрлуулж, бүс нутгийн орнуудын аюулгүй байдалд заналхийлж байна гэж буруутгажээ. Латин Америк, Карибын тэнгисийн тус бүс нутаг 1960-аад оны үед цөмийн зэвсэггүй бүс болсноо зарласан аж.