-Хэвийн боов үйлдвэрлэгч хэч­нээн байгууллагыг шалгасан бэ. Зөрчил хэр их гарав?

-Нийслэлийн мэргэжлийн хянал­тын дэд даргын баталсан Сар шинийн баяр болж байгаатай холбогдуулаад  аж ахуй нэгжийг шалга гэх удир­дамж гарсан. Уг удирдамжийн дагуу 2012 оны хоёрдугаар сарын 8-нд нийслэлийн мэргэжлийн хяналт, Баянгол дүүргийн мэргэжлийн хянал­тын газар хамтраад Баянгол дүүргийн 18 дугаар хороонд байрлах  гандантэгчилэн хийд болон ойр орчимд нь шалгалт хийсэн. Энэ үеэр Гандантэгчилэн хийдийн гал тогоонд хийгдэж байгаа хэвийн боов стандартын болоод эрүүл ахуйн нөхцөл хангахгүй байгааг тогтоосон. Тиймээс бид шаардлагатай цэвэр­лэгээ, ариутгал  хийхийг даалгасан. Мөн тус хийдийн ойр хавьд шалгалт хийсэн. Энэ үеэр  хувь хүмүүс Гандантэгчилэн хийдийн нэрийг ашиглан, хаана үйлдвэрлэсэн нь мэдэгдэхгүй, хаяг шошгоны зөр­чилтэй хэвийн боов худалдаалж байгаа хэрэг олон гарсан. Ер нь энэ сарын 15-нийг дуустал бүх дүүргээр шалгалт явагдаж байгаа.

-Шалгалтын эцсийн дүн хэзээ зарлах вэ?

-Энэ сарын 15 гэхэд бүх газраа шалгаад 17-нд нэгдсэн дүнг мэдээлнэ.

-Нийслэлийн мэргэжлийн хянал­тын газраас Гандантэгчилэн хийд ул боов хийж байгаа нь стандартын болоод эрүүл ахуйн шаардлага хангаагүй гэж үзсэн. Та энэ дүгнэлттэй санал нэг байна уу?

-Шаардлага хангасан, хангаагүй эцсийн бүтээгдэхүүн дээр харагдана. Манай хийд хийсэн хэвийн боовоо нийслэлийн Мэргэжлийн хяналтын газрын дэргэдэх лабораторит шинж­­лүүлэхээр өгсөн. Эцсийн бү­тээгд­хүүний шинжилгээний үр дүн гараагүй байгаа. Ер нь хэний хү­­сэлтээр гэнэт шалгалт хийснийг мэдэхгүй юм. Тэгэхдээ ганцхан Гандантэгчилэн хийд хэвийн боов хийгээгүй шүү. Хувь хүн болоод албан байгууллага ч хийж байгаа. Жишээ нь: манай  хийдийг тойроод хувь хүмүүс “Гандангийн хэвийн боов” гээд зарж л байна. Сая наашаа орж ирэхдээ харсан байх “Гадны хүн орохыг хориглоно”, “Хэвийн боов иргэдэд худалдахгүй” гээд бичсэн байгаа. Манай хийд 700 гаруй ламтай  хэрэгцээнийх нь хэвийн боовыг өгөж чадахгүй байна. Хийдийн байшин барилга чанарын шаардлага хангахгүй байгаа нь үнэн. Бид энэ талаар Онцгой байдлын ерөнхий газар болон нийслэлийн Мэргэжлийн хяналтын газарт хэлсэн. Харин хэвийн боовны чанарын тал дээр гэвэл манай хийд харьцангуй чанартай бүтээгдэхүүн хэрэглэдэг. Хэрэглэж байгаа хүнсний зүйлүүд дандаа дотоодын бүтээгдэхүүнүүд  байдаг. Тиймээс хүний биед сөрөг нөлөөгүй юм.

-Хэрэглэгчдэд хэвийн боовоо худалдах уу?

-Хүсэл их байна. Даанч манай гол тогооны хүчин чадал хүрэхгүй байна. Хийдийн гал тогооны барилга 1983 онд аж ахуйн зориулалтаар баригдаж байсан юм. Хүчин чадал үнэхээр муу байгаа болохоор хүссэн ч чадахгүй байна. Тиймээс ирэх жилээс гал тогоогоо энэ байгаагаас нь гурав дахин томруулна.

-Гандантэгчилэн хийдийн га­дуур хувь хүмүүс гандангийн хэ­вийн боов гээд худалдаалж  байна. Энэ тал дээр хийдийн захиргаа арга хэмжээ авсан уу?

-Эдгээр хүмүүсийг бид бу­руут­гахгүй байгаа. Үнэхээр чанарын шаардлагыг нь хангаад  хэрэглэгчдэд хүргэж чадаж байгаа бол сайн байна.

-Иргэддээ энэ жил хэчнээн ширхэг хэвийн боов худалдаалсан бэ. Цагаан сараас өмнө хэвийн боовоо дахин худалдаанд гаргах уу. Нэг ширхгийг нь хэдэн төгрөгөөр худалдаж байна вэ?

-Нийт 10 мянган хэвийн боов худалдаалаад байна. Өдөрт мянгыг хийлээ гэж бодоход 10 өдөрт багтаагаад 10 мянган хэвийн боов үйлдвэрлэнэ гэж тооцоолж байна. Нэг ширхгийг 1700 төгрөгөөр бор­луулж байгаа.

Гандантэгчилэн хийдээс хэ­вийн боов авахаар ирсэн иргэн У.Бат­доржоос хэдэн асуулт асуусан юм.

-Нийслэлийн Мэргэжлийн хянал­тын газраас Гандантэгчилэн хийдийг шалгаж үйлдвэрлэж бай­гаа хэвийн боов нь стандартын бо­лоод эрүүл ахуйн чанар хангахгүй гэсэн дүгнэлт хийсэн. Энэ мэ­дээллийг сонссон уу?

-Сонссон.

-Мэдсээр байж яагаад хэвийн боов авахаар ирсэн юм бэ?

-Гандангийн хэвийн боовыг аравнайлж, рашаанаар зуурсан гээд л давуу талтай зүйл олон байгаа. Тийм болохоор авах гэж ирсэн. Ямартай ч ийнхүү хариулах хүн олон байсан юм.

Тэд чанрын шаардлага хангахгүйг нь мэдсээр байсан ч хэвийн боов авахаар Гандантэгчилэн хийдийг зорьсоор.