Дэлхийн ба Монголын нүүрсний салбарт хөрөнгө оруулагч, үйлдвэрлэгч нар, мөн энэ салбарт хамтран ажилладаг бүх хүрээнийхэн өнөөдөр “Coal Mongolia-2012” чуулга уулзалтад оролцохоор “SS convention center”-т  цуглалаа. Энд 700 гаруй төлөөлөгч цугласан байв.

Чуулга уулзалтын өнөөдрийн хурал “Нүүрсний салбарын өнөөгийн байдал, чиг хандлага, нүүрсний зах зээл ба Монголын өрсөлдөх чадвар”, болон “Эрчим хүчний нүүрс, хөрөнгө оруулалтын төслүүд, техник технологи, байгаль орчин” гэсэн үндсэн гурван хэсгээс бүрдэж, 18 цаг хүртэл үргэлжиллээ.

“Coal Mongolia-2012” чуулганы нээлтийг Эрдэс баялаг, эрчим хүчний дэд сайд Ц.Гарамжав болон АНУ, Канад, Хятад, Оросоос Монгол улсад суугаа элчин сайдууд, төлөөлөгч нар хийсэн юм. Нэгдүгээр хэсэгт нийт гурван илтгэл хэлэлцүүлсэн бөгөөд Үндэсний хөгжил шинэтгэлийн хорооны дарга Ч.Хашчулууны “Монгол Улсын макро эдийн засгийн төлөв байдал” илтгэлд дурдсанаар энэ онд Монгол Улс дэлхийд эдийн засгийн өрсөлдөх чадвараараа  142 орноос 96 дугаарт байрт орсон үзүүлэлтийг танилцуулсан нь ихээхэн анхаарал татаж байлаа. Энэ нь Монгол Улс өнөө цагт эдийн засгийн хөгжил буурай гэдэг ойлголтыг халах нэгэн алхам байж болох ажээ. Эдгээр илтгэлүүд бүгд нүүрсний салбарт тулгамдсан асуудлуудыг хөндөж чадсан ач холбогдолтой болсон хэмээн сайшаагдаж байсан бөгөөд ЗТБХБ-ын яамны Төрийн нарийн бичгийн дарга Ж.Бат-Эрдэнийн “Уул уурхайн салбарыг зам тээврийн бодлогоор дэмжих нь” сэдэвт илтгэл мөн төлөөлөгчдийн анхаарлыг ихээхэн татаж байв. Энэ тухай ЗТБХБ-ын яамны Төрийн нарийн бичгийн дарга Ж.Бат-Эрдэнээс нүүрсний салбар дахь зам тээврийн тухай товч асуулаа.

-Уул уурхайн, тэр дундаа нүүрсний салбарийн хөгжилд саад болж байгаа нь дэд бүтэц гэдэг. Тэгэхээр үүнийг яаж шийдэх вэ?

-Шийдэх гарц нь мэдээж, гадаад руу зам тавих асуудлыг түргэвчлэх хэрэгтэй байна. Зөвхөн нүүрс гэлтгүй, Монгол улсын хэмжээнд эдийн засгийн түлхэц болох нь дэд бүтэц. Энэ хүрээнд Шинэ бүтээн байгуулалтын болон Төмөр замын талаар баримтлах бодлогын бичиг баримтыг гаргасан. Шинэ бүтээн байгуулалтын бичиг баримтын хүрээнд бид 5700 км замыг зургаан жилийн дотор байгуулахыг тусгасан байгаа. Ер нь жилдээ 300-аад км зам хийдэг байснаартооцвол бид арван хэдэн жил хийх хэрэгтэй болж байсан юм. Өнгөрсөн жил 1200 гаруй км замыг хийсэн. Ингэхдээ 400 км замын хөрөнгийг улсын төсвөөс гаргаж, бусдыг нь хувийн хэвшлийнхэн гаргасан.  Нөгөө асуудал бол төмөр замын асуудлын бодлогоо тодорхойлсон. Тавантолгойгоос зүүн тийш гарч байгаа буюу зүүн өмнөд ази руу гарч байгаа зам, урагшаа хятад руу гарч байгаа замыг нийлүүлж хамт барих нь зүйтэй гэж тогтсон.

-Эдгээр ажлуудыг хэзээ эхэлж хэзээ дуусах бол?

-Бидний үзэж буйгаар зайлшгүй эхлүүлэх шаардлагатай нь хавар. Харин дуусах нь тодорхойгүй. Яагаад гэвэл энэ ажилд таван тэрбум доллар хэрэгтэй байгаа. Засгийн газар тодорхой хэмжээний хөрөнгийг босгож, нөгөө талаас энэ төмөр замын үйл ажиллагаан дээр оператор компаниуд, аж ахуй нэгжүүд, стратегийн түншлэлүүд орж ажиллавал хөнгөрөх юм байна гэж тодорхойлсон. Энэ үндсэн дээр 49 хувийг нь хувьчилъя гэж тогтоод,  ер нь хуулийнхаа дагуу төр 51 хувийг эзэмшээд явна гэсэн үг юм.