Хятад улс ирэх жил шинэ удирдагчаа нэрлэнэ. Бээжингийн эрх баригчдын эртнээс бэлтгэж буй энэ хүн бол Хятадын дэд дарга Си Жинпинг юм. Дэлхийн хамгийн олон хүн амтай улсыг удирдах Си Жинпин ирэх долоо хоногт АНУ-д айлчилж, Ерөнхийлөгч Барак Обаматай уулзахаар төлөвлөж байгаа нь олон улсын анхаарлыг татаж байна.Си Жинпинийг дэлхийн санхүүгийн тогтворгүй байдал, байгалийн баялгийн нөөцийн хомсдол, байгаль экологийн хямрал, Түвд, Шинжань Уйгурын хурцадмал асуудал зэрэг олон саад бэрхшээл хүлээж байгаа. Ямартай ч тэр энэ сарын 14-нд Цагаан ордонд АНУ-ын Ерөнхийлөгч Барак Обаматай уулзах Си Жинпин байсхийгээд хурцадмал болдог АНУ, Хятадын хоорондох харилцааг шинэ шатанд гаргахыг хичээж байгаа бололтой. Ху Жинтао 2002 онд Хятадын дарга болохын өмнөхөн АНУ-д хийсэн айлчлалын үеэр өөрийгөө боловсон бөгөөд хэтэрхий хашир, нууцлаг улс төрч болохоо харуулсан гэдэг. АНУ-ын дэд ерөнхийлөгч Жое Байдан түүний нээлттэй, шулуун занг гайхаж байсан бол Хятадын Засгийн газрын зөвлөхөөр олон жил ажилласан зохиолч Роберт Лоуренс Канн түүнийг Хятадын удирдагчдаас тэс өөр буюу нээлттэй удирдагч болно гэжээ. Си Жинпиний аав Си Чонцун 1949 онд Хятадад төрийн эргэлт хийсэн хувьсгалд гол үүрэг гүйцэтгэсэн хүмүүсийн нэг байсан бөгөөд 30 гаруй жил шоронд хоригджээ. 1978 онд суллагдсаныхаа дараа тэрээр Шенженийн Эдийн засгийн бүсийг бий болгоход чухал үүрэг гүйцэтгэсэн аж.
Си Жинпин Бээжингийн алдартай Цинхуа их сургуулийн химийн ангид элсэхээс өмнө Хятадын умард нутагт алтны уурхайд ажиллаж байжээ. Хятадын армийн том генералын туслахаар гурван жил ажилласан Си Жинпин хөдөө аж ахуйн томоохон суурингийн захирагч болсон аж. Тэрбээр 1985 онд АНУ-ын Айова муж руу гахай үржүүлэх техник судлахаар явахдаа суурингийнхаа коммунист намын Ерөнхий нарийн бичгийн дарга болсон байв. АНУ-д томилолтоор очихдоо тэрбээр нутгийн фермерийнд зочилсон гэдэг. Си Жинпин Фужянь мужийн захирагчаар томилогдсоны дараа хүнд суртлын хүнд системийг нураасан нь нэр хүндийг нь улам өргөжээ. 2007 онд Си Жинпин Хятадын Улс төрийн товчооны хамгийн нөлөө бүхий есөн гишүүний нэг болж байсан юм. Хэдийгээр Си Жинпин Хятадын ирээдүйн удирдагч болох нь нэгэнт тодорхой болсон ч Ху Жинтаог төрийн тэргүүнээс буухаас нааш өөрийн жинхэнэ дүр төрхийг харуулж чадахгүй гэдэгт ажиглагчид итгэлтэй байна.
