Монголчууд “Эдээрээ оролдвол эвдэхийн цондон, эхнэрээрээ оролд­вол салахын цондон” гэдэг. Ха­рин Их хурлаараа оролдол яадаг юм бол. УИХ дахь Ардын намын бүлгийн ээлжит бус хурал өчигдөр нэг иймэрхүү тоглоомоор тоглож өнжлөө. Ардын намынхан УИХ-ын 2008 оны сонгуульд олонх болсоноо сая л ухаарч, УИХ-ын дэд даргын албыг Г.Батхүүгээс салгах, байнгын хорооны даргын албан тушаалыг Ардчилсан намынхнаас хурааж авах бөөн ажил өрнүүлэв.

“Шаварт унасан шарга даага” гэгчээр энэ лай ланчигтай ажлаа УИХ-ын дарга Д.Дэмбэрэлд үүрүүлж, нүгэл үйлдүүлэхээр шийдсэн аж. Насаараа нам дагасан өвгөн дарга даалгавар биелүүлэхгүй гээд хаачих вэ. Муухан мушигнаад ажилдаа орж явчихаж. Байнгын хорооны дар­га нарыг томилохдоо баруун, зүүн аймгаар нь тэнцвэржүүлэх ая­даад хэдэн нэр бариад орсон нь бүлгийн хурал дээр чамгүй маргаан дэг­дээсэн сурагтай. Ямартай ч УИХ дахь байнгын хорооны дарга на­рыг томилохдоо АН, МАН-аараа ая­тайхан хуваагаад хүч тэнцүүлсэн байд­лаар хуваарилсан нь ийнхүү задарч, Ардын намын УИХ болж хувирлаа. Сонгуулийн өмнө Их хурлаараа “тоглож” буй олонхийн намыг ямархан хувь тавилан тосч буйг хэн ч таашгүй. Гагцхүү УИХ-ын дарга Д.Дэмбэрэл дахин энэ албанд томилогдохгүйгээ гадарлаад намын удирдлагынхаа даалгавраар сүүлчийн “нүгэл”-ээ үйлдсэн нь энэ болов уу. Түүнчлэн “Хорхойд хоргүй явсан спикер “хүүхдүүд”-ээс ихийг сурч байна” хэмээн үе тэнгийнх нь “сөрөг хүч”-нийхэн үг хаяад авсан гэнэ. Хор найруулахыг өдий насанд сурна гэдэг хоцрогдоогүйн шинж гэж егөөдөх хүн ч цөөнгүй байгаа аж.