Үндэсний хөгжил, шинэтгэлийн хорооны дарга Ч.Хашчулуун: ЭДИЙН ЗАСГИЙН ӨСӨЛТ ХӨӨС ГЭДЭГТЭЙ САНАЛ НИЙЛДЭГГҮЙ
-Эдийн засгийн өсөлт уул уурхай, санхүү гэсэн хоёр салбарт өссөн. Харин бусад салбарт эдийн засгийн өсөлтийг бий болгохын тулд хугацаа хэрэгтэй. Дор хаяж 1-2 жил шаардлагатай. Эдийн засгийн өсөлттэй байгаа салбараас татвар авч бусад салбарыг хөгжүүлэх нь чухал юм. Энэ бүгдийг Засгийн газрын бодлогоор зохицуулах учиртай. Эдийн засгийн өсөлт иргэдэд мэдрэгдэхгүй байна гэж хэлж болохгүй. Наанадаж иргэдийн цалин нэмэгдэж, баталгаа бий болж буй. Мөн зам барих төслийг хэрэгжүүлэхээр эрчимтэй ажиллахаар төлөвлөсөн. Харин хөдөө аж ахуй, бүтээн байгуулалтын томоохон төслийн тухайд хугацаа шаардана. Түүнчлэн эдийн засгийн өсөлт газар зүйн хувьд тодорхой бүс нутгуудад төдийлөн мэдрэгдэхгүй байгаа. Иймээс л хугацаа хэрэгтэй гээд байгаа юм. Ер нь эдийн засаг сүүлийн нэг жилийн хугацаанд хурдацтай өслөө. Хэдийгээр манай улс эдийн засгийн өсөлтөөрөө дэлхийд дээгүүрт явж байгаа ч буурай хөгжилтэй орны тоонд яваа гэдгээ ойлгох хэрэгтэй. Тийм учраас бага орлоготой орноос дунд орлоготой орны тоонд орох ёстой. Зарим эдийн засагч эдийн засгийн өсөлт хөөс гэж ярьж байгаатай санал нийлдэггүй. Нэг жишээ хэлэхэд манай улсад орон сууцны хороолол нэмэгдэж байна. Энэ нь эдийн засгийн өсөлт хөөс биш гэдгийг баталгаа юм. Ямартай ч эдийн засгийн өсөлтийг бүх салбарт бий болгохын тулд төрийн бодлого шаардлагатай. Жижиг, дунд үйлдвэрлэлийг татвараас хөнгөлөх, хөгжлийн индекст тулгуурлан хөгжүүлэх гээд олон арга бий.
МҮАН-ын дарга М.Энхсайхан: ЭДИЙН ЗАСАГ ЭРҮҮЛ БИШ БАЙНА
-Хавдар гэдэг өвчин хүний биед зогсолтгүй, хурдтай өсдөг гэдгийг хүн бүр мэдэх байх. Эдийн засгийн өсөлт ер бусын хурдтай байна гэдэг нь эдийн засаг эрүүл биш байгаагийн дохио. Хавдар туссан хүний организм үхдэг шүү дээ. Үүнийг бодох хэрэгтэй.
-Эдийн засгийн өсөлт зөвхөн дотоодын нийт бүтээгдэхүүний өсөлтөөр хэмжигдэж байдаг. Нэг ёсондоо иргэдэд орлогын хуваарилалт хэрхэн хийж байгаа гэдгээс хамаарна. Ер нь эдийн засгийн өсөлт байж болно. Гагцхүү хүн амд хүртээмжтэй өсөлт үү гэдэг нь чухал.
-Иргэдийн амьдралд нөлөөлөхүйц гурван үгийг бодлогодоо тусгаж өгөх хэрэгтэй. Энэ нь юу гэхээр тогтвортой, тэнцвэртэй, оролцоотой өсөлт юм. Ардчилсан нам, Ардын нам аль нь хамаагүй энэ гурван үгийг л тусгах ёстой. Одоогоор нэг секторт дулдуйдсан эдийн засгийн өсөлттэй байгаа. Тиймээс л манай танхим дээрх гурван үгийг төрийн бодлогод тусга гэж санал болгоод байгаа хэрэг. Хэрэв тогтвортой, тэнцвэртэй, оролцоотой өсөлтийг бий болгож чадвал эдийн засгийн өсөлт иргэдэд хүрнэ. Үүнд танхимын болон хувийнхаа зүгээс 100 хувийн баталгаа өгч чадна. Ийм итгэлтэй байгаа учир эрх баригчдыг “Бидний үгийг сонс, анхаар” гээд байгаа юм. Бид ийм санаачилга гаргаад байгаа юм биш. Дэлхийн бусад улс орны туршлагад үндэслэж байна. Өөр зүйл байхгүй.