УИХ-ын чуулганы нэгдсэн хуралдаанаар Монгол Улсын 2012 оны төсвийн тухай хуульд нэмэлт, өөрчлөлт оруулах тухай, Нийгмийн даатгалын сангийн 2012 оны төсвийн тухай хуульд өөрчлөлт оруулах тухай хуулийн төслүүдийг хэлэлцээд олонхийн саналаар “Хэлэлцэх нь зүйтэй” хэмээн үзэж, холбогдох байнгын хороонд шилжүүллээ. Ингэснээр УИХ-ын Төсвийн байнгын хороо 14.30 цагт хуралдаж, дээрх төсвийн тодотголыг авч хэлэлцэх үүрэг хүлээж байна.

Мөн чуулганаар зарим гишүүдийг байнгын хорооны гишүүнээс чөлөөлж, мөн томилох шийдвэрийг гаргалаа. Энэ нь Засгийн газрын гишүүнээр томилогдсон сайд нарыг УИХ-ын Төрийн байгуулалтын байнгын хороо, Төсвийн байнгын хороо, УИХ-ын Аюулгүй байдал, гадаад бодлогын байнгын хорооноос тус бүр чөлөөллөө. Мөн Засгийн газрын гишүүнээс чөлөөлөгдсөн УИХ-ын гишүүн Л.Болд, С.Ламбаа, С.Баярцогт, Х.Баттулга, Л.Гансүх нарыг байнгын хороодын гишүүнээр баталлаа.
Ингэснээр чуулганы нэгдсэн хуралдааныг өндөрлүүлэв.