“…Россия без В.Путина, За честные выборы…” өөрөөр хэл­бэл “В.Путингүй Орос улс шу­дарга сонголтын төлөө” гэсэн үг Орос орныг бүрхжээ. Тэд энэ удаагийн Ерөнхийлөгчийн сон­гуулиар юу хүсэж байна вэ. Сүү­лийн үед яагаад ОХУ-д олон тооны эсэргүүцлийн жагсаал болоод бай­на аа. Эдгээр асуултууд дэлхий нийтийг гайхшруулсаар. Цаашлаад В.Путины төлөө санал өгөх гэж байсан сон­гогчдыг ч эргэлзүүлж эхлэв бо­лолтой. ОХУ-ын ирэх зургаан жи­лийг хэн удирдах нь гуравдугаар сарын 4-ний өдөр болох Ерөнхийлөгчийн ээлжит сонгуулиар тодорхой болно. Чухам энэ өдөр л ОХУ-ын ард түмэн өөрсдийн сонгох, сонгогдох эрх чөлөөг эдэлж, төрийн тэргүүнээ сонгоно. Чухам энэ удаагийн сонгуулиар Оросын ард түмний эрх ашиг харагдана.

Одоогийн байдлаар нэр дэв­шигчдийн нэрс тодорсон байгаа. Ха­рин Москва хотноо дан ганц В.Пу­тинг эсэргүүцсэн жагсаал, цуглаан үргэлжилсээр байна. Тэдний дуу хоолой дэлхий даяар цуурайтаж байна. Дэлхийн өнцөг булан бүрт ОХУ-ын одоогийн Ерөнхий сайд В.Путинг эсэргүүцэж буй хүмүүсийг харсаар байна. Өөрөөр хэлбэл, түүнд сонгуульд ялалт байгуулах боломж нь улам багассаар байгааг шинжээчид дүгнэжээ.

Харин В.Путины итгэмжлэгдсэн туслах олон нийтэд дээрх жагсаалыг “Оросын тагнуулын албад хоёр гурван жилийн өмнөөс л одоогийн Москвад болоод буй жагсаал цуг­лааныг эртнээс төлөвлөсөн гэдгийг сануулж байсан. Улс төрийн байд­лыг бусниулах төлөвлөгөөг АНУ-ын Вашингтонд бэлтгэсэн байх магадлалтай” хэмээн АНУ-ыг бу­руутгав. Мөн Ерөнхий сайдын хэвлэлийн нарийн бичгийн дарга Д.Песков “ОХУ-ын улс төрийн сис­темийн шинэчлэл ба либеральчлалд чиглэсэн томоохон өөрчлөлтийг хийхийн тулд ийнхүү жагсаж байгаа юм. Үүний ард их хэмжээний хөрөнгө амласан, магадгүй өгсөн АНУ чухал үүрэг гүйцэтгэж буйг үгүйсгэхгүй” хэмээн мэдэгджээ.

“Боль­шая Якикенко” талбайд өнгөрсөн бямба гарагт хийсэн жагсаалыг сөрөг хүчин “Шударга сонгуулийн төлөө” хэмээн зарлаж байсан. Жагсаалд ойролцоогоор 100 гаруй мянган хүн уг нь нэгдсэн. Гэхдээ үүнийг “Жагсаалд оролцоно гэсэн хүмүүсийн дөнгөж тал нь ирлээ” хэмээн албаныхан мэдэгдсэн билээ. Жагсаалын үеэр Санкт-Петербург хотноо 30 гаруй мянган хүн дэмжиж жагссан юм. Дээрх жагсаалын эсрэг В.Путиныг дэмжсэн 100 мянга га­руй хүн зохион байгуулалттайгаар “Поклонная гора” талбайд мөн жагс­сан байна. Зохион байгуулалттай гэсний учир тун энгийн. В.Путиныг дэмжсэн жагсагчдын зарим нь “Намайг аж­лаас хална, энэ жагсаалд ор гэсний дагуу энд ирсэн” хэмээн ОХУ-ын зарим хэвлэлд ярьжээ.

ОХУ-ын зарим улс төр суд­лаачид өчигдөр яаралтай хуралдсан талаар “Россия Новости” агентлаг мэдээлжээ.  Улс төр судлаач Ж.Ана­толи “Манай улсад болж буй жагсаал тайван явагдаж байгаад хамгийн их баярлаж байна. Ирэх гуравдугаар сард болох Ерөнхийлөгчийн ээлжит сонгуулийн дүр зураг тодорч эхэл­лээ. Улс төрийн ямар бодлого хаа­наас явуулж байгаа нь илт боллоо. В.Путинг эсэргүүцэгчдийн хувьд хүчтэй байр суурьтай байгаа нь харагдаж байна. Харин энэ бүх эсэргүүцлийн үг, жагсаалыг хааж, нуух гэсэн түүний оролдлого бү­тэлгүйтсэн хэвээр. Ямартай ч эдийн засгийн бус эрх мэдэл, эрх чөлөөний төлөө тэмцэж байгаа гэдэгт бид итгэлтэй байна. Сонгуулийн дүнг сайн нягтлах ёстой гэсэн дүг­нэлтийг гаргаж байна. Үүний тулд сонгуулийн хороон дахь гадны хяналт маш сайн байх ёстой” гэж иргэдэд анхааруулжээ.

ОХУ-ын эх орончдын хүч­нийх­ний цуглаан болон сөрөг хүчнийхний арга хэмжээнүүд  ямар нэгэн зөрчилгүй болж өн­гөр­сөн. “Поклонная гора”-ийн Зас­­гийн газ­рыг дэмжих цуглааныг зо­хион байгуулагчдын нэг На­деж­да Корнеева цагдаагийнханд саа­туу­лагдсан. Түүнийг өчигдөр су­лласан талаар эх сурвалжууд он­цлов. Зохион байгуулагчдын мэ­дэгдлийн дагуу арга хэмжээнд 15 мянган хүн оролцох ёстой байж. Харин Дотоодыг хамгаалах яамны авсан тоо баримтаар 15 мянга нь 130 мянга хол давжээ. Үүнээс болж цагдаагийнхан  нийслэлийн  гол урсгал зам болох Кутузовын өргөн чөлөөг хаахаар болсон аж. “Шударга сонгуулийн төлөө” цуглаанд улс­төрийн хоригдлуудыг чөлөөлж, Сон­гуулийн төв хорооны тэргүүн Вла­димир Чуровыг огцруулахыг шаардсан. Улмаар “Яблоко” намын тэргүүн Григорий Явлинскийг гу­равдугаар сарын 4-нд болох Оросын Ерөнхийлөгчийн сонгуульд нэр дэв­шигчээр бүртгэхийг шаардсан тог­тоолыг батлуулснаар жагсаал өндөрлөсөн юм. Жагсаалын үеэр хүний амь нас эрсдээгүй. Жагсаал тайван бол­сонд иргэд талархаж бай­гаа­гаа илэрхийлсэн байна. Өмнө нь иймэрхүү жагсаал хийхэд удир­дагчийг нь баривчлан жагсагч­дыг хүчээр тараадаг байсан талаар BBC агентлаг онцолсон юм. 

В.Путин “Ведомости” сонинд нийтлүүлсэн өгүүлэлдээ “Орчин цагийн технологийн баазад, дээр суу­рилсан, өрсөлдөх чадвартай аж үйлдвэртэй шинэ эдийн засаг Орос оронд хэрэгтэй байна. Тавь­сан зорилгодоо хүрэхийн тулд Ерөнхий сайд миний бие хэд, хэдэн шийдвэрийг санал болгож байна. Технологийн хоцрогдлыг арилгах ЗХУ задарснаас хойш ОХУ өөрийн эдийн засгаа дэлхийн эдийн засагт интеграцчилах боломжтой байсан. Гэвч ийм боломж га­раа­гүй. Харин үүнийг байгалийн баял­гийнхаа хү­чээр хийж чадлаа. Улс орны хүнд үйлдвэрлэл бараг хаягд­сан бай­далтай байна. ОХУ өнөөдөр ч гэсэн хэрэглээний бараа, технологиос ба­раг бүрэн хамааралтай хэвээр бай­на. Энэ байдлыг халах цаг нэгэнт болсон” хэмээжээ.

ОХУ-ын эдийн засагч Дмитрий Каталевский “Ерөнхий сайд тул­гараад буй асуудлыг зөв тавьсан. Хамгийн гол нь  хэрхэн шийдвэрлэх арга нь ойлгомжгүй байна. Хээл хахуулийг багасгах хэрэгтэй хэмээн тэрбээр хэлсэн. Гэхдээ яаж багасгах юм бэ. Энэ нь ойлгомжгүй байна. Хувийн болон улсын хөрөнгө оруулалтын харьцаа бас тэнцүү бус байдалтай байна. Үнэн хэрэгтээ дэлхийн туршлагатай харьцуулахад манай улсын компаниуд гэдэг бас тийм ч муу ажиллаад байгаа юм биш. Эдийн засаг дахь улсын хувийг багасгаад хэрэггүй гэж бодож байна. Харин эдгээр компаниуд нь ил тод байх ёстой гэдэг нь ойлгомжтой. Учир нь компаниудад чухам юу болж байгаа, санхүүгийн асуудлаа хэрхэн зохицуулдаг зэргийг ойлгож байгаа хүн ховор бололтой. Энэ байдал хээл хахуульд идэгдэх таатай уур амьсгалыг бий болгож байгаа юм. Тэгэхээр улсын байгууллагууд өнөөгийн байдлаараа илүү үр ашиггүй юм” хэмээн онцолсон юм.

Энэ бүгдээс үзэхэд ирэх сарын 4-ний өдөр болох ОХУ-ын Ерөн­хийлөгчийн ээлжит сонгууль ши­рүүн болох төлөвтэй байна. Мөн гадны ажиглагчдын анхаарах ёстой зүйлийн нэг нь Сонгуулийн төв хороон дахь хяналтаа сайжруулах шаардлагатай юм байна.