УИХ-ын эрхэм гишүүн, Монгол Улсын баатар Э.Бат-Үүл ирэх сонгуульд өрсөлдөхгүй гэсэн мэдээ өнгөрсөн намраас чих дэлссэн юм. Тэр чимээ түрүүчийн долоо хоногийн дундуур бүр лавширсан. Гишүүн ч үүнтэй зэрэгцээд “Бие чилээрхсэн. Зусландаа байна” гэсэн товчхон хариутайгаар Төрийн ордонд хэд хоног харагдаагүй. Харин тэрбээр өнөөдөр ордонд иржээ.

Э.Бат-Үүл гишүүн их улс төрөөс хөндийрч, гэр хорооллын иргэдийг амины тохилог орон сууцжуулах үйл хэрэгт идэвхийлэн оролцох гэсэн аж. Харин АН-ынхан энэ хэд хоногт Э.Бат-Үүл гишүүнийг том улс төрөөс гаргахгүй байх “хөдөлгөөн” өрнүүлжээ. Ардчиллын нэрийн хуудсыг УИХ-ын танхимаас гадуур байна гэж тэд төсөөлөхгүй гэдгээ хэлсэн байна. Ингээд Э.Бат-Үүл гишүүний УИХ-д нэр дэвшихгүй гэсэн бодлыг АН-ынхан “хамтарсан хүчээр” дарж авчээ.