УИХ-ын Эдийн засгийн байнгын хорооны хуралдаанаар өнөөдөр валютын ханш хийгээд нефтийн бүтээгдэхүүний үнийн өсөлтийг судалж, цаашид авах арга хэмжээний талаар санал дүгнэлт боловсруулах үүрэг бүхий ажлын хэсгийн мэдээллийг сонсох байсан юм. Гэвч ажлын хэсгийн гишүүд санал дүгнэлтээ нэгтгэж, гарын үсэг зураагүй гэдэг үндэслэлээр энэ асуудлыг хойшлууллаа. Ингэснээр үнэ ханшийн өсөлтийг судлах үүрэг хүлээсэн ажлын хэсгийнхний мэдээлэл ийнхүү хоёр дахь удаагаа хойшлогдлоо. УИХ-ын Эдийн засгийн байнгын хорооны дарга Д.Зоригтын хэлснээр бол ажлын хэсгийн бүрэлдэхүүнд багтсан гишүүд бүгд санал дүгнэлттэй холбогдуулан гарын үсгээ зураагүй байгаа нөхцөлд дүгнэлтийг авч хэлэлцэх боломжгүй хууль зөрчсөнд тооцдог байна. Одоогийн байдлаар тус ажлын хэсгийн бүрэлдэхүүнд багтсан УИХ дахь МАН-ын бүлгийн гишүүд болох С.Бямбацогт, Р.Раш, Ц.Цэнгэл, Д.Балдан-Очир нар санал дүгнэлтэд гарын үсэг зураагүй байгаа аж. Тэгвэл УИХ-ын гишүүн С.Эрдэнэ, Д.Ганхуяг, З.Энхболд нар гарын үсгээ зураад буй юм.

УИХ-ын Эдийн засгийн байнгын хорооноос байгуулагдсан ажлын хэсгээс гаргасан дүгнэлтэд Монголбанк нь валютын ханшийг өсгөж, 2011 оны алдагдлаа нөхсөн. Валютын ханшийн өсөлтийг далимдуулан нефть импортлогч компаниуд үгсэн хуйвалдаж 2012 оны нэгдүгээр сарын 6-нд бүтээгдэхүүнийхээ үнийг хэт өндөр нэмсэн гэсэн дүгнэлт гаргасан юм. Мөн нефтийн бүтээгдэхүүний үнэ ханшид хяналт тавих ёстой Засгийн газрын харьяа байгууллагууд үүргээ гүйцэтгэж чадаагүйн зэрэгцээ Эрдэс баялаг, эрчим хүчний сайд Д.Зоригтын тушаалаар байгуулагдсан нефтийн үнэ ханшийг зохицуулах зөвлөл нь Өрсөлдөөнийг хянан зохицуулах тухай хуулийн хүрээнд татан буугдсан байх ёстой атал буугаагүй. Тэр байтугай нефть импортлогч нарыг оролцуулсан хуралдаан зохион байгуулж түүний маргааш өдөр нь буюу 2012 оны нэгдүгээр сарын 6-наас эхлэн нефть импортлогч компаниуд бензин, шатахууныхаа үнийг литр тутамд нь 260 төгрөгөөр өсгөсөн. Тиймээс Эрдэс баялгийн сайд хариуцлага хүлээх ёстой гэсний зэрэгцээ төв банкны удирдлага албан тушаалаасаа чөлөөлөгдөх ёстой гэж үзсэн билээ. Уг нь энэхүү хуралдаанд оролцохоор Монголбанкны ерөнхийлөгч Л.Пүрэвдорж, тэргүүн дэд ерөнхийлөгч Б.Жавхлан, дэд ерөнхийлөгч Н.Золжаргал, эдийн засагч Н.Дашзэвэг тэргүүтэй хүмүүс хүрэлцэн ирсэн байсан ч хурал болсонгүй, дахин зарлах болов.