УИХ дахь МАН-ын бүлэг үдээс хойш дахин хуралдсан юм. Түүгээр “Үдээс өмнө МАН-аас гарна гэдгээ мэдэгдсэн УИХ-ын гишүүн Д.Тэрбишдавга, Д.Балдан-Очир,  Б.Бат-Эрдэнэ, Н.Ганбямба, Р.Раш, Ц.Даваасүрэн нарын асуудлыг ярилцаж байна” гэсэн  яриа Төрийн ордонд тасарсангүй. Түүнчлэн МАН-ын удирдах зөвлөлийн хурлыг Тусгаар тогтнолын ордонд хийхээр зарлаад байгаа тухай яриа ч гарч  “бор шувуу” улам даамжирсан юм. Тэгвэл Бүлгийн хурал 17.30 цагийн үед өндөрлөлөө. Ингээд дуулианд нэр холбогдсон зарим гишүүнтэй уулзаж, МАН-аас гарах мэдэгдэл хийсэн эсэхийг нь тодруулав.

Гишүүн Ц.Даваасүрэн: -Би бүлгийн хуралд суугаагүй. МАН-аас гарах тухай яриагүй.

Гишүүн Б.Бат-Эрдэнэ: -Бүлгийн хурал дээр гишүүдээс МАН-аас гарах тухай асуудал гараагүй.

Гишүүн Д.Балдан-Очир: -Намаас гарах тухай бид яриагүй. Яагаад тийм яриа тарсныг мэдэхгүй.

Гишүүн Р.Раш: -Огт тийм асуудал хөндөгдөөгүй. Цуурхал гарсан байна гэв.

Эрхэм гишүүд ийн хэлээд, үдээс хойш бүлгийн хурлаар гишүүн Д.Лүндээжанцан нарын өргөн барьсан Орон нутгийн сонгуулийн тухай хуулийн төслийг хэлэлцсэн гэлээ. Ямар боловч Төрийн ордонд үдээс хойш тарсан дуулиан ийнхүү мухардлаа.