Жил бүр цагаан сарын өмнө болдог “ОБ Капитал” группийн нэрэмжит барилдаан өчигдөр Монгол бөхийн өргөөнд боллоо. Цагаан сарын сорилго энэхүү барилдаанд улсын гарьд Ж.Бат-Эрдэнэ, улсын заан Д.Рагчаа, Б.Соронзонболд, Ч.Санжаадамба, улсын харцага Д.Батболд, Ц.Содномдорж, улсын начин Ж.Гансүх, Д.Цогзолдорж нарын тэргүүтэй улс, аймгийн алдар цолтой хүчит 192 бөх зодоглон хүч бяраа сориход  Говь-Алтай аймгийн Цээл сумын харьяат, “Хилчин” спорт хороо, “Хантайшир” дэвжээ, “Алтай констракшн”-ы бөх,  улсын залуу гарьд Ж.Бат-Эрдэнэ түрүүлж, Архангай аймгийн Булган сумын харьяат, “Бөхбилэгт” дэвжээ,  “Макс” группийн бөх, улсын заан Д.Рагчаа үзүүрлэжээ.

Барилдаанд улсын гарьд нэг, улсын заан дөрөв, улсын харцага тав, улсын начин 18, аймаг цэргийн хурц арслан зургаа, аймгийн арслан 43, аймгийн заан 19, аймгийн харцага 12, аймгийн начин 65, залуу бөх 18 зодоглов. Барилдааны үеэр Төв аймгийн Баяндэлгэр сумын харьяат, ШШГЕГ-ын “Сүлд” спорт хороо, “Дүнжингарав” дэвжээ, “Нью хаппи” компанийн бөх, аймгийн хурц арслан Ч.Батчулуунд уран барилдааны шагнал олгожээ. Ч.Батчулуун арслан аймгийн начин А.Отгонбаатараар нэг, аймгийн заан Б.Болдбаатараар хоёр, аймгийн заан Т.Баасанхүүгээр гурав, улсын харцага Д.Батболдоор дөрөв давж, тавын даваанд аймгийн цолтнуудаас ганцаараа үлдэж, улсын заан Б.Соронзонболдод тахим буулгасан юм.