Манай улсад  хүнсний аюулгүй байдал, иргэдийн эрүүл аюулгүй орчинд амьдрах эрх ихээхэн зөрчигдөж байгаа талаар холбогдох мэргэжилтнүүд анхааруулсаар байгаа. Тэр тусмаа эх хүүхдийн эрүүл мэнд. Эх орны ирээдүй болсон хүүхдүүдийн эрүүл мэндэд  зориулагдсан үр дүнтэй бодит ажил шаардлагатай байгааг олж харан “Эрүүл Үрс-Гэрэлт Ирээдүй” ТББ нь Монгол хүүхдүүд Эх орондоо эмчлүүлж эдгэрэх, эрүүл чийрэг өсөн торних боломжийг нэмэгдүүлэхэд туслах зорилгоор 2010 онд байгуулагджээ. Үндэсний статистикийн газраас гаргасан судалгаанаас үзэхэд 2010 оны эхний таван сарын байдлаар Монгол улсад хорин долоон мянга таван зуун ерэн долоон мянган хүүхэд төрсөн бөгөөд эдгээрээс зургаан зуун хорин таван нярай нь нэгээс доош насандаа эндсэн байна.

“Эрүүл Үрс-Гэрэлт Ирээдүй” ТББ нь байгуулагдаад удаагүй ч энэ хамт олны хийсэн ажил их.  Эх Хүүхдийн Эрүүл Мэндийн Үндэсний Төвийн Хүүхдийн эрчимт эмчилгээний тасагт гурван ширхэг хяналтын мониторыг хандивлаж, Нийслэлийн харааны бэрхшээлтэй хүүхдүүдийн 116-р сургуульд орон зайн баримжааны сургалтын талбай байгуулж өгчээ. Энэ бүх ажлын санхүүжилтыг гадаадад ажиллаж, амьдарч байгаа монгол иргэдийн хандив тусламжаар хийжээ. Тэдний хийх дараагийн ажил бол ЭХЭМҮТ-ийн дутуу нярайн эрчимт эмчилгээний тасгийн чадавхийг бэхжүүлэхийн тулд нярайн инкубатор авахаар зорьж байгаа юм байна. Тэд 26 мянган ам.доллар цуглуулж чадвал ЭХЭМҮТ-ийн дутуу нярайн эрчимт эмчилгээний тасаг нярайн инкубатортай болох юм байна.

Энэ талаар “Эрүүл Үрс-Гэрэлт Ирээдүй” ТББ-ын гишүүн Ц.Эрдэмжаргал “ЭХЭМҮТ-ийн дутуу нярайн эрчимт эмчилгээний тасаг нь таван их эмч, 19 сувилагчийн орон тоогоор, нярайн 17-н оронд өдөрт дундажаар 25-28 нярайг хүлээн авч эмчилдэг байна. Хэдийгээр энэ нярайн инкубатор дутуу нярайн эрчимт эмчилгээний тасгийн чадавхийг бүрэн бэхжүүлж чадахгүй ч ажлын ачаалалыг багасгана гэж тэд үзэж байна. Энэхүү төсөл амжилттай хэрэгжвэл  цаашид бусад дутагдалтай байгаа тоног төхөөрөмжийг  нийлүүлэх талаар судалгаа хийж төслийг цааш үргэлжлүүлэх юм” гэлээ.