Налайх дүүрэг 30 мянга гаруй хүн амтай. Гэтэл өвлийн улиралд тус дүүргийн хүн ам 35 мянга болж өсдөг байна. Учир нь өвөл нийслэлийн хүн амын дийлэнх хувийг нүүрсээр хангадаг тус дүүрэгт ойролцоогоор 5000 гаруй иргэд ирж нүүрсний уурхайд ажилладаг нь эмнэлгийн үйлчилгээ авах иргэдийн тоог даруй 5000-аар өсгөдөг байна. Харин Налайх дүүргийн хувьд харьцангуй гэмт хэргийн гаралт багатай байдаг ч түргэн тусламжийн ганц машин хоногт дунджаар 70 гаруй дуудлаганд явдаг нь эрсдэл гарах нөхцлийг бий болгодог байна.

Энэ талаар тус дүүргийн Эрүүл мэндийн нэгдлийн Яаралтай түргэн тусламжийн их эмч Л.Түвшинжаргал “Төр засгаас иргэдийнхээ эрүүл мэндэд тавих хяналтаа сайжруулж байгаа гэх боловч хотоос 40-хөн км-ийн цаана бодит байдал ийм л байна. Улсын их хурлын нэг гишүүн жилд нэг тэрбум төгрөгөөр тойрогтоо болсон болоогүй хөрөнгө оруулалт хийж, Хятад улсад хөрөнгө оруулалт хийж байхад иргэдийн бодит амьдралд түргэн тусламжийн машин хүрэлцэхгүй, түүнээсээ болж амь эрсдэх тохиолдол байсаар л байна. Энэ бүхнээс албан тушаал дээгүүр мөнгө хөрөнгөтэй нэгэнд л хууль дүрэм үйлчилж байгаагаас бус, дундаас доогуур орлоготой иргэдэд үйлчилдэг хууль дүрэм, эмнэлгийн тусламж үйлчилгээ байдаггүйг хэлэх хүн олон” хэмээн ярилаа.