“UBS” телевизээс дөрөв дэхь жилдээ зохион байгуулж буй “Universe best songs-2012” уралдаант наадам өчигдөр UBS телевизийн дэлгэцээр нээлтээ хийн үзэгчдийн хүртээл болж эхэллээ. Энэ жил шинэ студиэс үзэгчдэд хүрч байгаа энэхүү нэвтрүүлэгт одоогийн байдлаар 600 орчим оролцогч бүртгүүлжээ. Нэвтрүүлгийн нэгдүгээр шатны шалгаруулалт ийнхүү дэлгэцээр үзэгчдэд хүрч эхэллээ. Харин шүүгчдийн бүрэлдэхүүнд өөрчлөлт оржээ.

Өмнөх жил дуучин Т.Ариунаа, хөгжмийн продюсер Рагу, Пентатоник академийн тэргүүн, ая зохиогч Б.Долгион нарын эрхмүүд ерөнхий шүүгчээр ажиллаж байсан билээ.  Энэ удаагийн наадмын шүүгчээр  Оросын “Премьер Министр” хамтлагийн дуучин Б.Амархүү, Б.Долгион, Рагу нарын хамт шүүхээр болжээ. Мөн ажиглагч шүүгчээр “Киви” хамтлагийн ахлагч, дуучин Ука, “Гурван охин” хамтлагийн дуучин Соло, Ану нар ажиллахаар болсон байна

“Universe Best Songs” наадмын эхний уралдаанд Ч.Цэлмүүн түрүүлж байсан бол удаах наадамд Б.Жавхлантөгс, А.Жаргал нар орж байсан билээ.

Дашрамд дурьдахад, “Universe Best Songs-2011” наадмын шилдэг 25 оролцогчийн оролцон тоглосон “Мартагдашгүй намар-2” кино дэлгэцнээ гарч, үзэгчдийн хүртээл болоод байгаа юм. "Universe-Best Songs-2012" наадмын Гран При буюу Тэргүүн байрын шагналтныг таван сая төгрөг, дэлхийн од дуучны концертыг гадаадын улс оронд очиж үзэх аялал, БНСУ-ын Конгжу урлагийн их сургуульд дөрвөн жил үнэ төлбөргүй суралцах эрхийн хамтаар хүлээж байгаа юм.