Италийн нийслэл Ром хотод их хэмжээний цас орсноос үүдэн авто замаар машин техник явах аргагүй болсон талаар ИТАР-ТАСС мэдээллээ. Түүнчлэн төмөр замын болон агаарын тээвэрт хүндрэл гараад байгаа юм. Тиймээс Дотоод хэргийн яамнаас энэ амралтын өдрүүдэд галт тэрэг явуулахгүй гэж мэдэгджээ.

Ромын хойд дүүргүүдэд 40 см хүртэл зузаан цас орж, зам талбай мөстөж магадгүй болоод байна. Цаг агаарын албаны урьдчилсан мэдээгээр цаашид байдал бүр хүндэрч магадгүй байгаа аж. Хотын дарга Жанни Алеманно нийслэлийн бүх албан газруудыг түр хугацаагаар хаах шийдвэр гаргаснаа мэдэгдлээ. Зөвхөн цагдаагийн, гал сөнөөх болон аврах албаныхан ажиллах юм.

Түүнчлэн өнөөдөр болох байсан Сери А лигийн “Рома” болон “Ювентус” клубын тоглолтын нэг өдрөөр хойшлуулжээ.