НҮБ-ын Аюулгүйн зөвлөл өнөөдөр Араб лигийн орнууд Сирид тайван байдал тогтоох төлөвлөгөөг шийдэхээр санал хурааж магадгүй байгаа тухай ВВС мэдээлэв. Энэ төлөвлөгөө нь Сирийн Ерөнхийлөгч Башар аль-Ассадын эрх мэдлийг түүний орлогчид шилжүүлэн, Сирид болж байгаа хүчирхийллийг зогсоох тухай юм. Харин ОХУ энэ төлөвлөгөөг өмнө нь дэмжээгүй бөгөөд одоо ямар шийдвэр гаргах нь тодорхойгүй байна.

Өнөөдөр Сирийн Хомс хотод 217 хүн амь үрэгдсэн талаар Сирийн Хүний Эрхийн Ажиглалтын Төвөөс мэдэгдлээ. Мөн Хомсын зэргэлдээх Халдия хотод 138 хүн амиа алдсан байна. Амь үрэгдсэн хүмүүс дунд эмэгтэйчүүд болон хүүхэд байсан бөгөөд байшин барилга галд автсан аж.

Ажиглалтын төвийн тэргүүн Рами Абдулрахман Арабын лигийн хүчирхийллийг зогсоох арга хэмжээг түргэн хугацаанд авахыг уриалжээ. Хэдийгээр дээрх мэдээ болон тоог нарийвчлан тогтоогүй ч Ал-Жазеера болон Ал-Арабиа телевизүүд гудамж дахь олон тооны цогцсыг үзүүлсэн байна.