“Уучлаарай, эрхэм жолооч та төлбөрт зогсоолд машинаа тавих гэж байна. Тасалбараа аван соёлтой үйлчлүүлнэ үү”. Энэ бичиг Драмын театрын өмнөх талбайн самбарт хадаастай байх. Самбарын доод хэсэгт  бичсэн үгэн дээр  шүршдэг будгаар хэн нэгэн нь “хуц” гээд биччихэж. Өнгөрсөн сараас мөрдөж эхэлсэн НИТХ-ын шинэ тогтоо­лын дагуу Драмын театрын өмнөх зогсоол төлбөртэй болж, үүнийг нь жолооч нарт сануулах зорилгоор энэхүү самбарыг хадсан хэрэг. Сурвалжлага хийхээр очсон тэр үед бараг машин байсангүй. Гэхдээ орой үзвэрийн цагаар энд машинаа тавьбал халааснаасаа “хөөр­хөн” төгрөг гаргах хэрэгтэй болж таарах нь. “Би энд саяхан жүжиг үзсэн юм. Гэтэл гарч ирээд бараг 4-5 мянган төгрөг өгсөн байх шүү. Хотын удирдлагууд энэ утгагүй тогтоолоо одоо болих хэрэгтэй. Бид чинь тэртээ тэргүй мөнгөө төлөөд энэ тоглолтыг үзэж байгаа шүү дээ” гэж Сүхбаатар дүүргийн иргэн Л.Намхайдорж ярьж байсан. Тэр үнэн бололтой.

Жолоочдод хандсан бичиг хад­сан манаачийн бүхээгт нэгэн хүн суух. Тэр хүнээс энэ талаар ямар нэгэн мэдээлэл авах гэсэн боловч ха­риулт өгсөнгүй. Гэтэл тун удал­гүй нэгэн жолооч гарч ирээд ирээд манаачийг загнаж эхлэв. Чих тави­бал тэр машины жолооч Драмын театрынхантай ажил хэргийн уулзал­таар ирж. Театрт таван цаг гаруй бо­лоод гараад иртэл 5000 гаруй төг­рөгийг манаач “ахад” тушаахаар бол­сон гэнэ. Энэ хүн шиг хэдэн хүн төлбөрт зогсоолын “базалтад” өрт­сөнийг тааж мэдэхгүй. Ямар ч байсан хэдэн цаг тавьбал яах тухай нарийн мэдээлэл жолооч нарт хомс байгаа учраас гарч ирээд багагүй маргалддаг бололтой.

Драмын театраас гадна нийслэлийн “Хангарьд” ордны өм­нөх талбайд мөн энэ зарчим үйлчилж байна. Энд хоёр ч бүхээг ажил­луулж иргэдээс мөнгө хураадаг ажээ. Гэхдээ зам товчлох гэсэн жо­лооч нар нэлээд хэдэн төгрөгөөр торгуулах гээд байдаг гэмтэй. “Би энд ажил хөөцөлдөх гэж л ирдэг. Зарим үед бүтэхээсээ бүтэхгүй нь их. Энэ бүрт би мөнгө хураалгаад байвал утгагүй биз дээ” гэж Сонгинохайрхан дүүргийн иргэн С.Нэргүй гэх эмэгтэй ярьж байсан юм. Үнэхээр ч мөнгө төлөх, төлөхгүйгээс шалтгаалсан маргаан энд нэлээд өрнөдөг бололтой. Зарим нь бүр машинаа унтрааж байгаад хэрэлдэж байв. Үүнээс болоод бага зэрэг түгжрэл үүсч байгаа харагдсан. Мөнгө хураадаг болсоноос хойш гурван сар өнгөрчээ. Жолооч нарын ч арга барил өөрчлөгдөж. "Хангарьд"-ын урдхан талд байрлах “Монтел” төвийн урд машинаа тавьчихаад хотын захиргаа руу алхдаг гэсэн.

Спортын төв ордны өмнөх тал­бай дээрх хоёр газартай адил хувь заяа­тай. Эндхийн зогсоолд орж ирж байгаа машиныг шар хувцас өмс­сөн залуу зохицуулж харагдлаа. Өм­нөх хоёр газартай адил хүн нь тусдаа байранд суугаад байсангүй. Жолооч болгон дээр очиж учрыг тайлбарлаж байгаа харагдав. Жолооч нар тэнд машинаа тавихаас өөр аргагүй тул хэсэг зандарч байгаад мөнгөө сарвайж байлаа. Үндэсний сагсан бөмбөгийн тэмцээн болоод өөр ямар нэгэн уралдаан тэмцээн болоход хөгжөөн дэмжигчид хэцүү­хэн асуудалтай тулгардаг аж. Гэх­дээ л гадна дотны хүмүүс машинаа зогсоолд “сойдог” учраас хэдхэн хор­мын дотор дүүрдэг ажээ. Сур­валж­лага хийхээр очсон тэр мөчид машин их байлаа. Учир нь, Бүх ард түмний 13-р спартакиадын бок­сын тэмцээн болж байгаа учраас хүмүүс олон байгаа харагдав. Харин төлбөрт зогсоолын тухай эндхийн манаач залуугаас тодруулахад дараах хариултыг өгсөн юм. “Уралдаан, тэмцээн болж байгаа нөхцөлд ачаалал ихтэй байдаг. Зарим жолооч нар загнаж л байдаг юм. Өмнөхөө бодвол жолооч нарын бухимдах нь арай гайгүй болсон. Энэ нь нэг талаараа зөв ч тэмцээн сонирхох гэж ирсэн хүмүүс давхар мөнгө төлөх нь хэр зэрэг юм бол гэж боддог” гэж нэрээ хэлэхийгхүсээгүй манаач ярьсан юм.

Ийнхүү энэ гурван газарт төл­бөрт зогсоолын журам мөрдөгдөж байна. Гэхдээ төлбөрт зогсоолын аш­гаасаа Драмын театр нь ч, Спор­тын төв ордон нь ч ямар нэгэн хувь хүртдэггүй гэх. Зогсоолоос хураа­сан бүх мөнгө Нийслэлийн авто замын санд төв­лөрдөг байна. Чухам энэ санд ху­римтлагдсан мөнгөөр юу хийж, ямар зам барих нь эргэлзээтэй. Тогтоол батлагдаад цөөнгүй хугацааг үдсэн ч жолооч нарын бухимдал багасаагүй байна. Гадны оронд ямар нэгэн үз­вэр үйлчилгээний газрын урд та­лын зогсоол хэрвээ төлбөртэй бол тухайн газартаа л ордог учиртай гэх. Тухайн үзвэрийн тасалбар дээр энэ үнэ нь нэмэгдсэн болохоор зогсоолын нэмэлт төлбөрийг төлөөд байдаггүй. Гэтэл манайд хэдэн ми­нут зогссоныхоо төлөө мөнгө өг­дөг, хураадаг болоод удаж байна. Зогсоолоос хурааж байгаа энэ их мөнгө чухам юунд зарцуулагдаж, хэний дансанд орж байгаа нь хамгийн том асуулт. Хэл ам татлан байж иргэдээс хурааж байгаа энэ мөнгийг зөв зүйлд л зарцуулаасай гэсэн хүслийг эцэст нь шивнэе.