Royal HD телевизийн уран бүтээлчид “Согтуу Монголоос Саруул Монгол” нэртэй зорилтот шоу нэвтрүүлгийг үзэгчдийн хүртээл болгоод багагүй хугацаа өнгөрч байгаа билээ.

Энэ нэвтрүүлгийн зорилго нь нийгмийн хамгийн ухамсар дорд хэсэг гэж үздэг архичдыг нийгэмшүүлж, эрүүл саруул амьдралд хөл тавихад нь туслахад оршдог. Тийм ч болохоор энэ нэвтрүүлгийн баатрууд амьдралдаа алдаж, нийгмийн нэгээхэн цаг үеийн золиос болсон, нэг ёсондоо бусдын хайр ивээлээр дутаж яваа “гудамжны” гэж бид нэрлэдэг эгэл жирийн залуус байдаг юм. Тэднийг товчхондоо өөрийгөө ялах гэж яваа хүмүүс гэж тодотгож болно.

Хүний амьдрал баян. Амьдралын шуурганд уруудсан ч сөрж зогсохоор тэмцэж яваа энэ залууст Монголын спортын сор болсон тамирчид өөрсдийн санаачилгаар туслахаар шийдэж, Royal HD телевизийнхэнд ханджээ. Тэд бол Монгол Улсын Хөдөлмөрийн баатар Э.Бадар-Ууган, Х.Цагаанбаатар, Гавьяат тамирчин Б.Наранбаатар, “TLG-13” ТББ-ын тэргүүн Э.Тулга болон урлагийнхны төлөөлөл “ТВ коктейль” хамтлагийн жүжигчин Э.Цолмонбаяр нар юм. 

“Амжилтын төлөө хамтдаа” ТББ-ыг үүсгэн байгуулсан гавьяатууд “Согтуу Монголоос Саруул Монгол” зорилтот нэвтрүүлгийн арван оролцогчийг өдрийн хоолонд урьж, гарын бэлэг гардуулан, чин сэтгэлийн яриа өрнүүлжээ. Энэ тухай сонирхолтой нэвтрүүлгийг өнөөдөр   21.10  цагаас Royal HD телевизээр хүлээн авч үзэх боломжтой аж.

Royal HD телевизийн “Саруул Монгол” төслийн “Ерөнхий ивээн тэтгэгч: Монголын ард түмэн” уриаг Монголын шилдэг тамирчид өөрсдийн санаачилгаар дэмжихийн сацуу нийт ард түмэндээ хандан архины хор хөнөөлөөс өөрсдийгөө аврахаар хичээж байгаа, бусдыг архидалтын эсрэг сэтгэлзүйд дуудаж  байгаа арван оролцогчдод сэтгэлийн дэм хайрлахыг уриалсан юм.

“Амжилтын төлөө хамтдаа” төрийн бус байгууллагын энэхүү уриалгыг Монголын спортын шилдэг тамирчид ч дуу нэгтэйгээр дэмжиж, Хөдөлмөрийн баатар П.Сэрдамба нэвтрүүлгийн оролцогчидтой уулзаж, сэтгэлийн дэм өгсөн бол Монгол Улсын гавьяат тамирчин, уулчин Г.Өсөхбаяр арван оролцогчийн хамт сонирхолтой аялал хийхээр санаачилга гаргажээ.

“Саруул Монгол” зорилтот нэвтрүүлгийн оролцогчдод болон Royal HD телевиз, “Амжилтын төлөө хамтдаа” төрийн бус байгууллагын хамт олонд амжилт хүсье.