Саяхан л Төрийн ордонд сүр дуулиантайхан нээлтээ хийж байсан “Хөх толбот хүмүүс” киног бүтээгч болох “DOZ Entertainment”-ийн уран бүтээлчид яаралтай хэвлэлийн бага хурал хийхээр зарлалаа. Тэд маргааш 14.00 цагт “Монгол-Ньюс” мэдээллийн төвд сэтгүүлчдэд мэдээлэл хийх гэнэ. Учир нь “Хөх толбот хүмүүс” киноны маш чухал материалыг хулгайд алдсан байна. Иймд хэвлэлийн хурал зарлаж, олонд мэдэгдэж байгаа аж. Энэ талаар “DOZ Entertainment”-ийн захирал, жүжигчин Ш.Доржсүрэнгээс тодрууллаа.

-Яаралтай хэвлэлийн хурал зарласан гэх мэдээлэл ирлээ, “Хөх толбот хүмүүс” кинотой холбоотой материал алдагдсан гэсэн, үнэн үү?

-Тийм ээ, шинэ жилийн үеэр манай нэг notebook хулгайд алдагдсан. Тэгээд тэр notebook дотор кинотой холбоотой чухал материалууд байсан юм. Би өөрөө одоо эмнэлэгт хэвтэж байгаа болохоор, манай хэд л хэвлэлийн хурал хийх гэж байгаа юм.

-Таны бие зүгээр үү?

-Ах нь одоо зүгээр ээ. Миний бие гайгүй. Санаа зоволтгүй ээ.

-Ингэхэд тэр чухал материалууд нь эргэж олдох уу, цагдаад мэдэгдсэн юм уу?

-Харин л дээ, олдох нь уу. Санаа зовж байна. Манай хэд цагдаад мэдэгдсэн байгаа. Маргааш хурлаар илүү тодорхой ярих байх аа.