МАН-ын гуравдугаар Бага хурал Тусгаар тогтнолын ордонд үргэлжилж байна. Тус Бага хурлыг нээж МАН-ын дарга, Монгол Улсын Ерөнхий сайд С.Батболд “Ард түмний хөгжлийн хөтөлбөр”-ийн талаар илтгэл тавьсан юм. Илтгэлд дурдсанаар тус намынхан төрийн албан хаагчдын сарын дундаж цалинг 2012-2016 онд 1,3 сая, 2016-2021 онд 2,5 сая төгрөгт хүргэх зорилт тавьжээ. Мөн “100 мянган айл” орон сууц хөтөлбөрийг хэрэгжүүлэх хүрээнд залуу гэр бүлд зориулсан “Залуучуудын түр орон сууц” хөтөлбөрийг хэрэгжүүлэхээ мэдэгдлээ. 2016-2021 онд 4-өөс дээш хүүхэдтэй гэр бүлийг төрөөс нэг удаа үнэ төлбөргүй орон сууцаар урамшуулдаг болох зорилт тавьснаа ч энэхүү илтгэлийнхээ үеэр онцоллоо.

Одоо тус Бага хуралд МАН-ын Удирдах зөвлөлийн гишүүн, намын нарийн бичгийн дарга Я.Содбаатар “Ард түмний хөгжлийн хөтөлбөр”-ийн нийгмийн салбарын хөгжлийн тухай сэдвээр илтгэл тавих гэж байна.

Дашрамд сануулахад, МАН-ын гуравдугаар Бага хуралд 200 гаруй төлөөлөгч оролцож байна. МАН-ын дарга, Ерөнхий сайд С.Батболд, УИХ-ын дарга Д.Дэмбэрэл, Монгол Улсын Ерөнхийлөгч асан Н.Багабанди, УИХ дахь МАН-ын бүлгийн гишүүд, мөн бага хурлын гишүүнд багтдаг аймгийн Засаг дарга нар нар оролцож байна.

Энэ удаагийн хурлаас дөрвөн хүнийг Бага хурлын гишүүнээр сонгох юм байна. Тодруулбал, Засгийн газрын гишүүнээр сонгогдохоосоо өмнө төрийн алба хашиж байсан Эрүүл мэндийн сайд Н.Хүрэлбаатар, Байгаль орчин, аялал жуулчлалын сайд Д.Цогтбаатар, Хүнс, хөдөө аж ахуй, хөнгөн үйлдвэрийн дэд сайд П.Баянмөнх, Зам тээвэр, барилга хот байгуулалтын дэд сайд Б.Цэнгэл нарыг намын бага хурлын гишүүнээр сонгох юм.