Хятадын баруун өмнө нутгийн Гуанси-Чуанийн автономын районы Лунзян гол кадмий гэх хортой, хүнд металлаар бохирджээ. Бохирдсон ус даваа гаригийн өглөөнөөс 3,7 сая хүн амтай Люжоу хотын усан санд цутгасан байна. Сүүлчийн хэмжилтээр усан сангийн усны шинжилгээг авахад кадмийн агуулга байх ёстой хэмжээнээс ес дахин их гэж гарчээ. 

Экологийн сүйрлийн үр дагаварыг бууруулахын тулд цэрэг, цагдаагийн ажилтнуудыг дайчилсан байна. Хортой бодисын хэмжээг бууруулахын тулд усанд тусгай бодис хийж байгаа гэнэ. Бохирдсон голын ус усан санд нэмж цутгасаар байгаа учраас ойрын өдрүүдэд цэвэршүүлж чадахгүй бололтой. Ус цэвэршүүлэх арга хэмжээ төдийлөн үр дүнгүй бол эрх баригчид усан хангамжийн нөөцийн эх сурвалжийг ашиглаж эхлэх ажээ. Голын урсгалын эхэнд баригдсан үйлдвэрээс болж бохирдсон учраас тус үйлдвэрийг хаагаад байна.