Монголын бүх ард түмний XIII их наадам өчигдөр /2012.01.30/ боксын спортын төрлөөр эхэллээ. 2012 оны нэгээс дөрөвдүгээр сарын хугацаанд дөрвөн үе шаттай зохион байгуулах их наадам спортын 23 төрөл, хөгжлийн бэрхшээлтэй иргэдийн спортын дөрвөн төрлөөр улс орон даяар үргэлжлэх юм.
 
Өчигдөр нээлтээ хийсэн боксын аварга шалгаруулах тэмцээнд 25 байгууллагын 240 гаруй тамирчин эрэгтэй ес /49, 52, 56, 60, 64, 69, 75, 81, -91 ба +91 кг/ ба эмэгтэй гурван /51, 60, 75 кг/ жингийн ангилалд өрсөлдөж байна. Бээжингийн олимпийн аварга, Монгол Улсын Хөдөлмөрийн баатар, Гавьяат тамирчин Э.Бадар-Ууган, дэлхийн аварга П.Сэрдамба, Гавьяат тамирчин У.Мөнх-Эрдэнэ нар энэ удаагийн тэмцээнийг өнжиж байгаа ч Гавьяат тамирчин Н.Төгсцогт үндсэн жин болох 52 кг-д, мөн Монголын олимпийн боксын холбооны үндэсний шигшээ багийн тамирчид болох ОУХМ З.Энхзориг, Д.Отгондалай, Б.Жавхлан, С.Эрдэнэбаяр, Т.Чулуунтөмөр, Б.Түвшинбат нарын шилдгүүд оролцож байгаа юм.

Боксын аварга шалгаруулах тэмцээн хоёрдугаар сарын 5-ныг хүртэл Спортын төв ордонд үргэлжилнэ. Медалийн төлөөх тоглолтууд баасан гаригт эхлэх юм байна.

Дашрамд дуулгахад, МБАТ-ий XIII их наадмын хөтөлбөрийн дагуу боксын тэмцээний дараа буюу ирэх хоёрдугаар сарын 16-19-нд цана болон тэшүүрийн тэмцээн болно.