Эгч, дүү 5-12 насны охидыг хүчирхийлж, нэгнийх нь амийг хөнөөсөн гэмт хэрэг үйлдсэн ч өршөөлийн хуулиар суллагдсан П.Сумъяажав дахин гэмт хэрэг үйлдсэн талаар бид мэдээлсэн. Тэрбээр  энэ сарын эхээр Баянгол дүүргийн тавдугаар хорооны нутаг дэвсгэрт үйл ажиллагаа явуулдаг нэгэн ломбардыг  4-5 этгээдийн хамт бүлэглэн тоносон байна. Уг хэрэг гарснаас хойш тэднийг 18 хоногийн дараа  цагдаагийнхан баривчилж, цагдан хориод байгаа аж. П.Сумъяажав тэргүүтэй дээрх   этгээдүүд  17-18 насных аж.  Эх сурвалжийн мэдээллээр тэд  ломбарднаас алт, монет, мөнгөн эдлэл, бэлэн мөнгө, гар утас зэрэг үнэт зүйлсийг бүгдийг нь авсан байна. Улмаар зарим нэгийг нь зарж, хулгайлсан зүйлсээ хувааж авчээ. Тэдний нэг нь Баянгол дүүргийн нутаг дэвсгэр аравдугаар хороолол орчимд ломбарднаас хулгайлсан гар утсаа барьж явахад нь цагдаагийнхан  саатуулснаар энэ хэрэг илэрсэн байна.  П.Сумъяажав  нь мөрдөн байцаалтад өгсөн анхны мэдүүлэгтээ  ломбард тонох хэргийг  анх санаачилж, таньдаг найзуудаа татан оролцуулсан болохоо хүлээжээ. Мөн тавуулаа  уг хэргийг бүлэглэн үйлдсэн ч  хоёр нь баривчлагдаагүй гэнэ.  Тэднийг цагдаагийнхан эрэн сурвалжилж байгаа аж.  Цагдан хоригдоод байгаа залуусын гэрт нэгжлэг хийхэд ломбарднаас алдагдсан зарим  үнэт зүйлс  олдсон ч ломбардад онц их хэмжээний хохирол учирчээ. Өөр нэг эх сурвалжийн мэдээллээр тэд ОХУ-руу хил даван оргон зайлахаар ярилцаж байсан аж.

Тэдэнд эрүүгийн хуулийн 145.3-т зааснаар  буюу зохион байгуулалттай бүлэглэж үйлдсэн,  энэ хэргийн улмаас хохирогчийг амьдралын эх үүсвэрээс нь салгасан буюу их хэмжээний хохирол учруулсан гэх үндэслэлээр эрүүгийн хэрэг үүсгэжээ. Хэрэв тэдний гэм буруутай нь тогтоогдвоо эд хөрөнгийг хурааж, хөдөлмөрийн хөлсний доод хэмжээг хоёр зуун тавин нэгээс таван зуу дахин нэмэгдүүлсэнтэй тэнцэх хэмжээний төгрөгөөр торгох,  эсвэл 5-10 жил  хүртэл хугацаагаар хорих ял шийтгэнэ гэж  заасан байна.

П.Сумъяжав нь  2009 оны хоёрдугаар сарын 14-ний өдөр шунахай сэдэлтээр Д.Бямбадоржтой урьдчилан үгсэн тохиролцож, Баянгол дүүргийн 19 дүгээр хороонд оршин суух иргэн О-гийн гэрээс  эд зүйл дээрэмдэх гэмт хэргийг зохион байгуулж, 11 сая 400 мянган төгрөг, “Коника” маркийн гэрэл зургийн аппарат зэргийг дээрэмдэх явцдаа таван настай Н-ийн хоолойг хэрчиж, амь насыг нь хөнөөжээ.  Тэрбээр энэ гэмт хэрэгтээ Д.Бямбадоржийг өдөөн түлхэж оролцуулсан байна.  Мөн 12 настай О-г биеэ хамгаалж чадахгүйг мэдсээр байж, онц харгис хэрцгий аргаар хоолойг нь хэрчиж амь насанд нь хүрэхийг завдаж, хүчирхийлэх гэмт хэрэг үйлджээ. Баянгол дүүргийн шүүх уг хэргийг 2010 оны аравдугаар сарын 15-ны өдөр анхан шатны журмаар хянан хэлэлцээд П.Сумъяажав, Д.Бямбадорж нарт дээрэмдэх гэмт хэргийг үйлдэх явцдаа нэг хүний амь насыг хөнөөсөн, нэг хүний амь насыг хөнөөхийг завдсан гэм буруутай нь нотлогдсон хэмээн үзэж 15 жилийн хорих ял оногдуулсан байна. Нийслэлийн шүүх уг хэргийг 2010 оны 12 дугаар сарын 14-ны өдөр давж заалдах шатны журмаар хянан хэлэлцээд Өршөөл үзүүлэх тухай хуулийн  4.1.5-д “ Гэмт хэрэг үйлдэж анх удаа хорих ял шийтгүүлсэн 18 насанд хүрээгүй ялтны шүүхээс оногдуулсан ялын хугацааг харгалзахгүйгээр эдлээгүй үлдсэн үндсэн болон нэмэгдэл ялыг өршөөн хэлтрүүлнэ” гэж заасны дагуу ялыг өршөөн хэлтрүүлсэн юм.