Дуучин Э.Оюумаа бие даан уран бүтээл туурвиж эхэллээ. Олон жил Ч.Бат-Эрдэнэтэй хоршин дуулсан боловч “Нарны унага”, “Ертөнцийн наран ээж”, “Хүлээлээ” гэх зэрэг ганцаарчилсан олон уран бүтээлийг энэ хугацаанд туурвижээ. Мөн “Мотив” хамтлагтай “Хайрын танго”, дуучин Э.Төрмандахтай хамтран “Саруул орчлонд жаргахсан” зэрэг дуунуудаа шинэчлэн дуулжээ.
 
Иймээс ирэх гуравдугаар сарын 7-нд “АСА” циркт бие даасан уран тоглолт хийхээр бэлтгэл ажилдаа орсон байна. Эхчүүд, бүсгүйчүүдтэйгээ Олон улсын эмэгтэйчүүдийн баярыг хуваалцаж байгаа тул дуун бэлэг хүргэх үүднээс Гавьяат жүжигчин Х.Болормаа, Соёлын тэргүүний ажилтан, дуучин Р.Дэлгэрмаа нартай хамтран “Эхийн ариун сэтгэл” дууг шинэчлэн дуулжээ. Үүнийг нь хөгжмийн найруулагч нь “Гурван маа хамтран дуулсан анхны тохиолдол” хэмээн хошигноод авна лээ.