Олимпийн хошой аварга, дэлхийн аварга Иван Ярыгиний нэрэмжит “Алтан гран-При” тэмцээн ОХУ-ын Красноярск хотноо үргэлжилж байна. Тэмцээний эхний өдөр буюу өнгөрөгч баасан гаригт Монголын тамирчдаас эмэгтэйчүүдийн 59 кг-ын жинд Т.Мөнхтуяа хүрэл медаль хүртсэн бол өчигдөр Гавьяат тамирчин О.Бурмаа мөнгөн медалийн эзэн боллоо. Эмэгтэйчүүдийн хамгийн хүнд жин болох 72 кг-д барилдсан тэрбээр эхний тойрогт ОХУ-ын бөх Виктория Фролова, хоёрдугаар тойрогт АНУ-ын бөх, дэлхийн аварга Ирис Смит нарыг ялж, хэсгийн аваргын төлөөх барилдаанд ОХУ-ын бөх, дэлхийн залуучуудын гурван удаагийн аварга Наталья Воробьеваг дийлжээ. Улмаар аваргын төлөө барилдаанд Болгарын бөх, дэлхийн таван удаагийн аварга Станка Златёвад хожигдсоноор Иван Ярыгиний нэрэмжит тэмцээнээс хоёр дахь мөнгөн медалиа хүртжээ. Тус жинд 14 бөх өрсөлдсөн байна. О.Бурмаа өмнө нь 2008 онд тус тэмцээнээс мөнгөн медаль хүртэж байсан юм.

Тэмцээний хоёр дахь өдөр буюу өчигдөр эмэгтэйчүүдийн 72 кг-ын жингээс гадна эрэгтэй 60, 66 кг, эмэгтэй 48, 55, 63 кг-ын жинд аваргууд тодорсон. Дээрх жинд медаль хүртсэн тамирчдыг танилцуулъя.

Эрэгтэй 60 кг:
Расул Муртазалиев /ОХУ/
Опан Сат /ОХУ/
Ахмед Чакаев /ОХУ/
Булат Батоев /ОХУ/

Эрэгтэй 66 кг:
Алан Гогаев /ОХУ/
Хетаг Рамонов /ОХУ/
Адам Батиров /ОХУ/
3. Сослан Рамонов /ОХУ/

Эмэгтэй 48 кг:
1. Ирина Мерлени /Украйн/
2. Юки Ириэ /Япон/
3. Марина Вильмова /ОХУ/
3. Любовь Сальникова /ОХУ/

Эмэгтэй 55 кг:
1. Канако Мурата /Япон/
2. Валерия Жолобова /ОХУ/
3. Айым Абдильдина /Казахстан/
3. Мария Гурова /ОХУ/

Эмэгтэй 63 кг:
1. Каори Ичо /Япон/
2. Наталья Смирнова /ОХУ/
3. Эрин Кложу /АНУ/
3. Любовь Волосова /ОХУ/

Эмэгтэй 72 кг:
1. Станка Златева /Болгар/
2. О.Бурмаа /Монгол/
3. Наталья Воробьева /ОХУ/
3. Алёна Стародубцева /ОХУ/

Тэмцээний сүүлийн өдөр буюу өнөөдөр Монголын тамирчдаас эрэгтэйчүүдийн 84 кг-д О.Үйтүмэн, Б.Номиндалай, 96 кг-ын жинд Н.Золбоо, 120 кг-д Ж.Чулуунбат нар зодоглоно.