Марокко улс Сирид болж байгаа хүчирхийллийг зогсоох тухай төслийг НҮБ-ын Аюулгүйн Зөвлөлд баасан гаригт албан ёсоор хүргэсэн тухай ВВС мэдээлжээ. Арабын Лигийн орнууд, Их Британи, Франц болон Герман улсууд НҮБ-ыг илүү хүчтэй арга хэмжээ авч, олон арван хүний амь үрэгдэж байгаа Сирийн хүчирхийллийг зогсоохыг шаардаж байна.

НҮБ-д хүргүүлсэн төсөл нь нэгдүгээр сарын 22-нд Арабын Лигийн орнуудын санаачлагаар  Сирийн Ерөнхийлөгч Башар ал Ассадыг өөрийн орлогчдоо эрх мэдлээ шилжүүлэхийг дэмжиж байгаа юм. Түүнчлэн Башар ал Ассадыг хүчирхийллээ зогсоон, бүх хотуудаас зэвсэгт хүчнээ гаргахыг шаардсан аж. Мөн арабын орнуудын болон олон улсын ажиглагчдад чөлөөтэй байдал бий болгохыг төсөлд бичсэн байна. Арабын орнууд дэлхийн улс орнуудыг Сирийн эсрэг хориг арга хэмжээ авахыг уриалж байгаа юм. Төсөлд бичсэнээр Дамаск хотын эрх баригчид дээрх шаардлагыг 15 хоногийн дотор хүлээн авахгүй бол нэмэлт хориг арга хэмжээ авна гэжээ.