Иргэдийн гол хэрэгцээг хангагчид бол “Нарантуул” олон улсын ху­далдааны тө­вийн 8000 гаруй тү­рээслэгч. Өчиг­дөр Монголын үйлд­вэрч­ний эвлэлүүдийн хол­бооны  ерөн­хийлөгч С.Ганбаатар тэргүүтэй хүмүүс “Нарантуул” за­хыг зорьж, талбай түрээслэгчдийн са­нал сэтгэгдлийг сонслоо. Тэд­ний гол хөндөж байгаа асуудал бол нийгмийн даатгалд хамрагдаж чадахгүй байгаа  явдал юм. Тэд яг л эзэнгүй аралд орхигдсон Робинзон Крузо шиг хүмүүс болсондоо  эмзэглэж буйгаа хэлээд нийгмийн даатгалд яаралтай хамруулж өгөхийг хүслээ. Эс бөгөөс өндөр насны тэт­гэвэр, тэтгэмжгүй болох гээд байгааг анхааруулав. “Хэ­дийгээр ар гэрээ тэжээж яваа ч социализмын үед байсан Худалдаа бэлтгэлийн яам, Худалдааны яам, Гадаадтай эдийн засгаар харилцах улсын хорооныхон шиг гол ачааг бид үүрч ирлээ” хэмээн түрээслэгчид хэлж байсан юм. Харин Монголын үйлдвэрчний эвлэлүүдийн холбооныхон нийг­мийн даатгалын асуудлыг нь нэн тэргүүнд шийдвэрлүүлэхээ амлалаа. Худалдаа эрхлэгчид гааль, төлбөр гээд олон хэлбэрээр улсын санхүүд дэм болдогийг хүн бүхэн мэднэ. Тиймээс этүрээслэгчид эрх ашгаа хамгаалах үүднээс Үйлдвэрчний эвлэлийн хороог байгуулан ажиллаж байна. Тус хорооны дарга Б.Байгалмаа өнгөрөгч онд түрээслэгчдээсээ хүлээн авсан 1000 өргөдлийг С.Ганбаатарт өргөн барив. Өргөдлийг ойрын хугацаанд Нийг­мийн даатгалын үндэсний зөвлөлд хүргэх гэнэ. Ийнхүү түрүүчээсээ тэтгэврийн насанд хүрч байгаа хүмүүсийн ирээдүй бүрхэг байна.