Худалдааны алдагдал 1980 онд хамгийн сүүлчийн удаа болж байсан боловч 2011 оны дүнгээр Японы гадаад худалдаанд анх удаа алдагдал үүссэн талаар Зас­гийн газар мэдэгдсэн байна. Им­портын давамгайлал 2.49 их наяд иен буюу 32 тэрбум ам.доллартай тэнцэж байгаа гэнэ. Импорт 12 хувиар өссөн байхад экспорт нь 2.7 хувиар буурчээ. Ийм хэмжээний алдагдлыг тус улсын Засгийн газар өнгөрсөн жил болсон газар хөд­лөлт, цунамитай холбон тайлбар­лаж байгаа юм. Байгалийн гамшиг Японы олон үйлдвэрт хөнөөл учруулаад зогсохгүй хангамжийн системийг хүртэл эвдэхэд хүргэсэн билээ. Үүнээс үүдэн "Toyota Motor" ба "Sony" гэх мэтийн экспортын бараа бүтээгдэхүүн үйлдвэрлэдэг компаниуд ихээхэн хэмжээний хохирол амсаад бай­на.

АНУ болон Ев­ро­пын тогтворгүй бай­дал хөрөнгө оруу­­лалтад илүү аюул багатай ие­нийг сонирхоход хүр­гэсэн явдал нь эцэстээ Японы ва­лю­тын үнэлгээ өсө­хөд нөлөөл­жээ. Энэ нь эцэстээ Японы экспорт­логчдод хүнд цохилт болно гэдгийг мэргэ­жилт­нүүд нэг бус удаа анхааруулж байсан юм.

Экспорт хумиг­дахын хэрээр им­портын хэмжээ нэмэгдсэн бө­гөөд үүнд эрчим хүчний нийлүүлэлт гол байрыг эзэлж байна. Газар хөдлөхөөс өмнө эрчим хүчний хэрэгцээний 30 ху­вийг цөмийн эрчим хүчний стан­цаар хангаж ирсэн юм. АНУ болон Европ нь санхүүгийн хүнд байдалд орсон байгаа бөгөөд энэ нь Японы гол зах зээл болж байлаа. Тиймээс гадаад худалдааны алдагдал цаашид ч гарах болно гэдгийг мэргэжилтнүд анхааруулж байгаа юм.