УИХ дахь Ардчилсан намын бүлгийн дэд дарга Л.Гантөмөр, УИХ-ын гишүүн Э.Бат-Үүл нар сэтгүүлчдэд мэдээлэл хийлээ. Тус намын бүлэг ээлжит бус хуралдаанаараа зургаан сайдыг томилохтой холбоотой асуудлыг авч хэлэлцээд “Тэргүүн шадар сайдын албыг байхгүй болгох. Хоёрдугаарт, УИХ-ын гишүүн гурван хүнийг сайдад нэр дэвшүүлснийг больж, оронд нь гаднаас өөр хүмүүсийг нэр дэвшүүлэх ёстой” гэж саналаа хүргүүлсэн, хариу ирүүлэхийг хүлээж буй. Уг нь хоёр сайдыг томилох бололцоог олгосон учраас өчигдрөөс эхлээд чуулганы нэгдсэн хуралдааныг хуралдуулах санал тавьсан. Харамсалтай нь, одоог хүртэл чуулганыг хуралдуулахгүй байгаа. Энэ бол зөвхөн Тэргүүн шадар сайдыг томилсон цагт бусад сайд нарыг томилох ёстой гэж нэг ёсны тулгалт хийж буйгаас өөрцгүй. Монгол Улсын Үндсэн хуульд Засгийн газрын гишүүдийг томилохдоо хүн нэг бүрээр хэлэлцэн батална гэж заасан. Энэ заалтыг үндсэндээ зөрчиж байна. Нөгөө талдаа  Ерөнхий сайдын хувьд Засгийн газраа бүрдүүлэх сонирхолгүй байгааг өнгөрсөн үйл явдлууд харууллаа гэж УИХ-ын гишүүн Э.Бат-Үүл хэвлэлийн хурлын үеэр мэдэгдлээ. Харин бүлгийн дэд дарга Л.Гантөмөр “УИХ дахь Ардчилсан намын бүлэг өчигдөр шийдвэрээ гаргаж, Ерөнхий сайдад хүргүүлэнгүүт орой нь телевизүүдээр захиалгат нэвтрүүлэг цацаж, нэг ёсны сонгуулийнхаа кампанит ажлыг эхлүүлээ. Үнийн хөөрөгдөл, төрийн албан хаагчдын цалинг нэмэх гэх мэт цаг үеийн тулгамдсан асуудлыг Засгийн газар шийдвэрлэх ёстой атал УИХ дахь Ардчилсан намын бүлэг саад тотгор учруулж байна. Засгийн газрын ажил үндсэндээ цалгардлаа, яамд эзэнгүйдлээ гэдэг мэдэгдлийг Засгийн газрын хэрэг эрхлэх газрын дарга Ч.Хүрэлбаатар өчигдөр хийсэн нь олон нийтэд Ардчилсан намынхныг муу, Монгол Улсын Ерөнхийлөгчийг муухайгаар харуулах гэсэн оролдлогынх нь нэг. УИХ дахь Ардчилсан намын бүлгийн хувьд Засгийн газрыг чадамжтай болгоё гэж үзээд, хоёр сайдыг томилох асуудлыг өчигдөр хэлэлцээд шийдвэрлэчихье гэж хэлсэн. Гэвч өнөөг хүртэл асуудалд хариу ирүүлсэнгүй, чуулганаа хуралдуулахгүй сууж байгаагийн зэрэгцээ УИХ-ын даргын дэргэдэх зөвлөлийн хуралдааныг ч хийлгүй сууж байна. Үнэхээр асуудлаа шийдвэрлэе гэж хүсч байгаа юм бол хоёр сайдыг томилоод Засгийн газар хуралдаад явах бололцоо бий. Мөн яамд эзэнгүйдэж байна гэдэг яриа гарсан байгаа. Яамд эзэнгүйдээгүй, сайд нар үүрэг гүйцэтгэж байгаа. Жишээлбэл, Батлан хамгаалахын сайдын албыг Г.Занданшатар үүрэг гүйцэтгэж орлож байгаа бол Эрүүл мэндийн сайдыг Т.Ганди, Сангийн сайдыг Засгийн газрын хэрэг эрхлэх газрын дарга тус бүр орлож байгаа. Дэд сайдууд нь ажлаа хийж байгаа, Төрийн нарийн бичгийн дарга нар ажлаа хийж байгаа, тийм учраас төрийн алба унасан тухай, болохгүй байгаа тухай ойлголт байхгүй” гэж мэдэгдлээ.

Тэд мөн сэтгүүлчийн асуултад дараах хариулт өгсөн юм.

-Ерөнхий сайдын хувьд Үндсэн хуулийн хүрээнд сайд нарыг дэвшүүлж оруулж ирсэн. Харин танай бүлэг шантаажлаад байгаа юм биш үү?

Л.Гантөмөр: -Ерөнхий сайдад асуудалд олон ургальч үзлээр хандах боломжууд бий. МАН-ын шийдвэр ганцхан үнэн байдаг гэдэг зарчмаасаа ухраачээ. Яахаараа МАН-ынх үнэн зөв, бусдынх нь санал буруу байдаг юм бэ. Одоо тэр Ерөнхийлөгчтэй холбоотой хийж байгаа гүтгэлэгт нэвтрүүлгүүд нь сонгуулийн ажлаа эхлүүлчихжээ гэж ойлгогдож байгаа. Сонгууль эхлэх болоогүй байна, үнийн хөөрөгдөл, өвөлжилтийн асуудал, батлагдсан төсвийг хэрхэн зарцуулах тухай асуудлын хүрээнд Засагт хийх ажил их байна. Энэ ажлаа хийх ёстой.

-Ерөнхий сайдыг Засгийн газрыг байгуулах хүсэл эрмэлзэлгүй байна гэж хэллээ. Ямар үндэслэлээр ийм мэдэгдэл хийгээд байна вэ?

Э.Бат-Үүл: -Үнэхээр Ерөнхий сайд МАН-ын дарга С.Батболдын үйл ажиллагааг харахаар Засгийн газраа байгуулах, Засгийн газраа ажиллуулах байдалд нэг их шамдахгүй байна. Үүнийг дөрвөн үндэслэлээр тайлбарлана. Нэгдүгээрт, Үндсэн хуулиар сайд нарыг томилохыг дэглэсэн байдаг. Сайдыг УИХ-аар хэлэлцэж томилохдоо нэгбүрчлэн хэлэлцэж батална гэсэн байдаг. Өөрөөр хэлбэл, нэг сайдын томилгоог нөгөө сайдын томилгоотой барьцалдуулж болохгүй гэсэн үг. Үнэн хэрэг дээрээ дөрвөн ч сайдын асуудлыг байнгын хороогоор оруулаад шийдэгдчихсэн. Одоо энэ асуудлыг УИХ-ын чуулганы нэгдсэн хуралдаанд оруулах бүрэн боломжтой. Цөөнхийн бүлгээс сайдаа томилохыг шаардаж байна. Гэтэл Тэргүүн шадар сайдын томилгоотой барьцалдуулаад байгаа байхгүй юу. Энэ чинь Үндсэн хуулийг зөрчиж байна. Үндсэн хуулийг мэдсээр байж, УИХ-ын дэгийг мэдсээр байж ингэж муйхарлаад байгаа нь цаана нь Засгийн газар байгуулахаас өөр сонирхол байна гэж хардахаас аргагүйд хүргэж байна.

Хоёрдугаарт, явуулж байгаа үйл ажиллагааг нь харахаар үнийн хөөрөгдөл, савлагаанаас болсон нийгмийн бухимдлыг өөр тийш нь бултуулж анхаарал сарниулаад байна. Гуравдугаарт, Засгийн газрыг байгуулахаасаа илүүтэй сөрөг хүчнийг Ерөнхийлөгчийг дайрч давшлах маягаар ерөөсөө ирэх хавар болох сонгуулийн үйл ажиллагаагаа эхлүүлээд байна. Түүндээ зориулсан суртлын ажил хийж байна. Дөрөвдүгээрт, энэ Засгийн газрыг байгуулахдаа сонгуулийн штаб болгох гэж байна. Үүргээ гүйцэтгэж байгаа ерөнхий нарийн бичгийн даргыг Тэргүүн шадар сайдын албан тушаалд, дээрээс нь Төрийн нарийн бичгийн дарга нарыг улстөрийн албан тушаал руу шилжүүлж буй үйл явцыг бүхэлд нь харахаар сонгуульд зориулж байна, энэ Засгийн газрыг.

Төрийн албаныханд хандаж “Бидний төлөө ажиллах юм бол ийм урамшуулал шагналтай гэдгийг хэлж байгаа илэрхийлэл гэж ойлгохоос аргагүй байна. Эдгээр дөрвөн шалтгаанаас харахад Засгийн газрыг ажиллуулъя гэхээсээ илүүтэй улстөрийн сонирхол л  байна.