Дархан-Уул аймгийн Дархан сумын XII багийн нутаг, Шинэ хорооллын 14 дүгээр байранд тав хоногийн өмнө дэлбэрэлт болсон билээ.  Мэргэжлийн хяналтын ерөнхий газраас  улсын байцаагч нар газар дээр нь ажиллаад иржээ. Тэд өнөөдөр 12.00 цагаас нөхцөл байдлын талаар мэдээлэл хийх юм байна. Дэлбэрэлтийн шалтгаан нөхцөл, хохирлыг тогтоохоор ОБЕГ, МХЕГ, ШУТИС-ийн хамтарсан ажлын хэсэг ослын газарт ажиллаад  өчигдөр нийслэлд ирсэн байна.

Сүүлд авсан мэдээллээр  дүгнэлт  гартал 6, 7, 8 давхрын оршин суугч 32 өрхийн, 113 хүнийг 15 дугаар цэцэрлэгийн байранд түр байрлуулах санал гаргажээ. Гэвч оршин суугчид  цэцэрлэгт байрлахаас татгалзаж, хамаатнуудынхаар байгаа юм байна. Мөн тухайн байрны 4, 5, 6 дугаар давхруудад тулгуур бэхэлгээ хийсэн аж.  Өчигдрийн байдлаар тус байрны 18 тоот өрөөнд ес, 22 тоотод 36, 12 тоотод ес гээд нийт 54 ширхэг тулгуур хийжээ. Сэргээн босголтын ажилд 130 гаруй хүн оролцож байгаа аж.