Шүүхийн шийдвэр гүйцэтгэх ерөнхий газрын харьяа “Сүлд” биеийн тамир, спортын газрын бөхчүүдийн 2012 оны аварга шалгаруулах барилдаанууд өчигдөр Спортын төв ордонд боллоо. Улс, аймгийн алдар цолтой бөхчүүдийн барилдаан, сумын цолтой болон залуу бөхчүүдийн барилдаан, нийтийн монгол бөхчүүдийн барилдаан гэсэн гурван барилдаан болсон бөгөөд барилдааны үеэр Дорнод аймгийн Цагаан-Овоо сумын харьяат, "Сүлд" спорт хорооны даргын албыг олон жил хашсан улсын начин Г.Пүрэв-Очирын алдрыг тэмдэглэж, хүндэтгэл үзүүллээ.

Улс аймгийн цолтой бөхчүүдийн барилдаанд улсын начин Ж.Гансүх, А.Батмөнх, аймгийн хурц арслан Ч.Батчулуун, аймгийн арслан Ж.Мөнгөн, Н.Батсуурь нарын тэргүүтэй 40 бөх зодоглосноос Төв аймгийн Баяндэлгэр сумын харьяат, “New happy” компани, “Дүнжингарав” дэвжээний бөх, аймгийн хурц арслан Ч.Батчулуун түрүүлж, Хөвсгөл аймгийн Цагаан-Үүр сумын харьяат, “Харганат цамхаг” компани, “Хөвсгөлийн хүчтэн” дэвжээний бөх, улсын залуу начин А.Батмөнх үзүүрлэн, Төв аймгийн Мөнгөнморьт сумын харьяат Ж.Мөнгөн шөвгөрөв. Шөвгийн тавд Увс аймгийн Ховд сумын харьяат, аймгийн арслан Н.Батсуурь, Говь-Алтай аймгийн Жаргалан сумын харьяат аймгийн арслан Ш.Шинэбаяр нар үлдэв.