Олон улсын жүдо бөхийн холбоо /IJF/-ны 2012 оны Европын цуврал тэмцээнүүд эхэлж байна. Цувралын анхных нь болох “Дэлхийн цом”-ын тэмцээн нэгдүгээр сарын 28, 29-нд буюу ирэх амралтын өдрүүдэд Болгар болон Гүрж улсад болно. Эрэгтэйчүүд Гүржийн Тбилиси хотноо, харин эмэгтэйчүүд Болгарын Софид өрсөлдөх юм. Тэгвэл дээрх хоёр тэмцээнд оролцох Монголын жүдочид өнөөдөр өглөө хилийн дээс алхжээ.

Тбилиси хотноо болох эрэгтэйчүүдийн “Дэлхийн цом”-д 81 кг-д О.Ууганбаатар, Г.Түвшинжаргал, -100 кг-ын жинд Н.Батсуурь нар оролцох бол Софид болох эмэгтэйчүүдийн “Дэлхийн цом”-д 57 кг-д Т.Баттөгс, Д.Сумъяа нар, 70 кг-д Ц.Наранжаргал нар Гавьяат тамирчин Х.Эрдэнэт-Одын удирдлага дор зодоглох юм байна. Сануулахад, “Дэлхийн цом”-ын түрүү бөх чансаагаа 100 оноогоор ахиулах боломжтой.

Болгар, Гүржид болох “Дэлхийн цом”-ын дараа буюу хоёрдугаар сарын 4, 5-нд Францын нийслэл Парис хотноо “Их дуулга”-ын тэмцээн болно.