“Зоос” банкны захирал асан Ш.Чуданжий нарт холбогдох хэргийг нийслэлийн Прокурорын газраас яллах дүгнэлт үйлдэн Чингэлтэй дүүргийн шүүхэд  энэ сарын 10-ны өдөр  шилжүүлсэн юм. Шүүхэд дуудагдаад байгаа Ш.Чуданжий захирал өнөөдөр Чингэлтэй дүүргийн шүүхэд саатлаа. Тэрбээр тус шүүхэд шүүгч Б.Цогттой уулзаад гарсан юм. Хатагтай Ш.Чуданжийгаас “Түүнд хамаарах шүүх хурлын тов гарсан эсэх, Зоос банкны хохирогчдын хохирлыг барагдуулсан эсэх” талаар  асуусан боловч “Би мэдэхгүй” гээд явж одов.

Сануулахад, “Зоос” банкийг дампууруулсан гэх хэрэгт тус банкны захирал асан Ш.Чуданжий, Сангийн яамны Төрийн сангийн газрын дарга Х.Пүрэвсүрэн, ТУЗ-ийн дарга асан Д.Батбаяр нарыг сэжигтнээр татан шалгаж, УМБГ-аас саяхан прокурорын хяналтад шилжүүлээд байсан юм. Тус банкинд Санхүүгийн болон аудитын компанийн хийсэн шалгалтаар банкны нийт хөрөнгө 187 тэрбум, нийт өр төлбөр 195.3 тэрбум төгрөг, алдагдлын хэмжээ 41.3 тэрбум төгрөг болж, нийт зээлийн 33.4 хувь нь чанаргүй гэсэн ангилалд байгааг хөндлөнгийн шинжээчид дүгнэсэн байна.