Би төр шүтэх үзэлтэн биш. Тийм ч учраас “Төрийн минь сүлд өршөө” гэж залбирдаг харанхуй бөгөөд айдас, хүйдэст автсан эцэг, өвгөө өрөвддөг.

Гэхдээ төр миний дээр байх ёстой гэж зөвшөөрдөг. Яагаад гэвэл тэр зохицуулагч хийхийн тулд бусдаас ялимгүй давуу эрх мэдэлтэй байх учиртай гэж итгэдэг. Цэвэр, тунгалаг, шударга, зарчимч байх ёстой гэж хүсдэг. Яагаад гэвэл Төр бол улс, үндэстний аюулгүй байдлын эх сурвалж юм. Загас толгойноосоо эхэлж өмхийрдөг… Бүгдээрээ өмхий ханхалсан намганд үйж живэхийг хүсэхгүй байгаа л бол Төрийг аюулгүй байдлын эх сурвалж, цэвэр тунгалгийн эх ундарга гэдгийг нь үргэлж сануулж, хянаж байх үүрэгтэй.

…Төрийн эрх мэдлийг улс төрийн намаар дамжуулан хэрэгжүүлэхээс илүү дээр ард­чил­лыг одоохондоо бурханд хайр­лагд­сан АНУ-д ч олоогүй байна. Мон­голд “Намаар дамжин төрийн эрх мэдэлд хүрч болно” гэдэг ганцхан дү­рэм цээжилсэн хэ­нээт­нүүд эхлээд нам байгуулж тог­лоно, дараа нь төрд шургаж то­мор­но. Ямар ч үзэл баримтлал, хөг­ж­лийн бодлогогүй, ар­даа зөвхөн том ком­панитай нам Мон­­голд бий болж л байсан. Парламен­тад суудал авч, бусдын Засгийн га­зарт хавчуулагдан төрийн эрхийг ба­рил­­цаж л байсан.

Аль нэг “Намын гишүүн байх” гэд­гээс өөр шал­­гуур шүүлтүүргүй, улс төрийн тохи­рол­цоо гэдэг хуульч­­­лаг­даагүй бохир ме­­ха­низмаас өөр зо­хи­­цуулалтгүй хам­­гийн бүдүүлэг ор­чинд бид Төрийг байгуулж байна. Үүнийг хэтрүүлэг гэж үзэвл арай зөөл­­рүүлээд хэлэ­­хэд төрийн хам­гийн чухал албан тушаалтан, сай­дуу­дыг тийм л орчинд тодруулан томилж байна.

“Нам шийдсэн байхад өөр хэн юу гэх юм бэ” гэж аархсан зарим нь сайдын албанд томилогдоогүй байхдаа л эрх мэдлээ зүүдэлж, хам­гийн түрүүнд хэнээс ямар өшөө авахаа тооцоолж, хаана хуруу дүрэх “бал” байгааг үнэрлэж байна. Энэ бол яг өнөөдөр стандарт бус Засгийн газрыг залруулах үйл явцын хүрээнд ажиглагдаж байгаа дүр зургийн нэг. Мөн сүүлийн хорин жил дэх үе үеийн Засгийн газарт хамаарах шүүмжлэл. Сайдууд улс төрийн томилгоо гэдгээр өөрөө цагаатгагдаад зогсохгүй, багын тоглолт нэрээр дээрээс доош чиглэсэн шатлалаар гар, хөлийн хүнээ томилж, төрийн нэрээр тонуул, дээрэм хийдэг үзэгдэл хавтгайрсан. Гудамжнаас төрд орж ирчихээд тэрбум, тэрбумаар нь танил талдаа тарааж өгчихөөд гараад явчихдаг жишээг хэн ч мэдэхгүй өнгөрдөг гэвэл худлаа. Мэдсэн нэгэн нь илчилж чаддаггүйд л учир нь бий. Өөр хоорондоо гинжин урвалаар холбогдож, нэг нэгээсээ урган гарсан үй түмэн алдаа, завхрал Монголын нийгмийг төртэй, юутай хамт гавлачихаад байгааг яаж өөрчлөх ёстой юм бол? Ядаж энэ дундаас Төрөө цэвэр,тунгалгаар авч үлдэх вэ?

Монгол төрт ёсны урт удаан түүх, уламжлалтай ард түмэн гэж омогшдог. Гэхдээ төрөө яаж хэрхэн яаж байгуулахад суралцаагүй ард түмэн. Төр чухамдаа юуны тулд байдгийг ч ойлгож амжаагүй ард иргэдтэй улс. Хөрсөнд халгайн үр суулгачихаад байхад сарнай ургахыг хүлээж хууртдаг сонгогчдод өнөөдөр боловсрол, улс төрийн намуудад нь ёс суртахуун хэрэгтэй болжээ. Тархинаасаа эхэлж өтчихөөргүй төр шиг төрийг байгуулж сурахын тулд үүнээс ч илүү зүйл хэрэгтэй биз ээ.

Төр хэврэгшиж байна. Ард түмний аюулгүй байдлын эх сурвалж болсон Төр нянтай орчинд амьсгалж байна. Тархинаасаа эхэлж өмхийрдөг амьд бие ганцхан загас биш шүү дээ.