Нийт 26 сая ам.долларын шагналын сантай Австралийн нээлттэй тэмцээний хоёрдугаар тойргийн тоглолт өндөрлөж шилдэг теннисчдийн тэмцэл улам өрнөлтэй болж байна.

Нэгдүгээр тойрогт эмэгтэйчүүдээс Австралийн Саманта Стосур болон эрэгтэйчүүдээс Испанийн Фернандо Вердаско нар хасагдсан бол хоёрдугаар тойрогт Америкийн тэргүүн теннисчин, дэлхийн чансааны наймд буй Марди Фиш, төдийлөн өндөр амжилт үзүүлж байгаагүй Колумбын Алжандро Паллад 6:7, 3:6, 6:7-аар гурван үеийн турш хожигдож нутаг буцах боллоо. Өнгөрсөн жил гайхалтай амжилттай байсан Фишийн хувьд дэлхийн чансаагаа найм хүртэл өсгөж, оны төгсгөлд “Мастеруудын цуврал”-д оролцсон тул америкчууд ихээхэн найдвар тавьж байлаа. Фишийг гурван үеийн турш буулган авсан дэлхийн чансааны 71-т эрэмбэлэгдэж буй Колумбын Палла нь “Их дуулга”-ын хамгийн өндөр амжилт гэвэл өнгөрсөн жилийн Францын нээлттэй тэмцээний дөрөвдүгээрт тойрогт шалгарсан юм.

Харин Америкийн нэрт теннисчин Энди Роддикийн хувьд хоёрдугаар тойргийн тоглолтод “Их дуулга”-ын хоёр түрүүт, цагтаа /2003 он/ дэлхийн чансааг тэргүүлж явсан Австралийн Лэвит Хьюиттэй таарлаа. Хьюит өнгөрсөн жилийн “Уимбльдон”-оос хойш тэмцээнд оролцоогүй байгаа бөгөөд чансаа буурч энэ тэмцээнд 181-т эрэмбэлэгдэн тоглож буй нь хоёрдугаар тойрогт гарах сонирхолтой тоглолтын нэг боллоо. Харин тэдний тоглолт удаан үргэлжилсэнгүй Роддик Хьюитт цааш тоглох боломжийг өглөө. Эхний тойрогт Роддик илүүрхэж 6:3-аар ялалт байгуулсан ч удаах сэтүүдэд Хьюитт 6:3, 6:3-аар манлайж Роддик түүнд цааш тоглох боломжийг олгосноор тэмцээнийг үргэлжлүүлээгүй байна. Роддик хэдийгээр хоёрдугаар тойргоос тэмцээнийг орхиж байгаа ч нутаг нэгт "Их дуулга"-ын 13 түрүүт /Австралийн нээлттэй тэмцээний 5 удаагийн аварга/ Серена Уильямстай холимог хосын төрөлд тоглох билээ.

Японы тэргүүн теннисчин, дэлхийн чансааны 24-т эрэмбэлэгдэж буй Кэй Нишикори хоёрдугаар тойрогт Австралийн Эбдэнийг 3:6, 1:6, 6:4, 6:1, 6:1 –аар буулган авсан бол Тайванийн Юан Шин Ли хоёрдугаар тойргийн өрсөлдөгчөө төвөггүй буулган авсан боловч дараагийн тойрогт 2009 оны Австралийн нээлттэй тэмцээний аварга, дэлхий чансааны 11-т эрэмбэтэй Хаун Мартин дел Потротой таарлаа.

Эмэгтэйчүүдийн хувьд нэгдүгээр тойрогт Австралийн Саманта Стосур тэмцээнийг орхисон бол хоёрдугаар тойргоос дэлхийн чансааны 29-т эрэмбэлэгдэж буй Оросын Надя Петрова Италийн Сара Эринад 2:6, 2:6-аар хоёр үеийн турш ялагдал хүлээлээ. Хэдийгээр Петрова ганцаарчилсан төрлийн тэмцээнээ дуусгаж байгаа ч 2009 оны хосын төрлийн дэд аварга Мария Крилинкотой хослон тоглож байна. Мария Крилинко хоёрдугаар тойргоо давсан ч гуравдугаар тойрогт өнгөрсөн жилийн “Уимбльдон”-ий аварга, дэлхийн чансааны хоёрт эрэмбэлэгдэж буй Чехийн Петра Квитоватай таарлаа.

“Их дуулга”-ын гурван түрүүт Мария Шарапова, Вера Звонарева нарын шилдгүүд  хоёрдугаар тойргийн учраагаа төвөггүй буулгаж байгаа ч дараагийн тойргуудад Серена Уильямс, Сабини Лисицки нарын шилдгүүд хүлээж байна.