УИХ-ын чуулганы нэгдсэн хуралдаан үргэлжилж байна. Түүгээр Монгол Улсын Ерөнхийлөгчөөс өргөн мэдүүлсэн Хэвлэл мэдээллийн эрх чөлөөний тухай, Хууль хүчингүй болсонд тооцох тухай, Эрүүгийн хуульд өөрчлөлт оруулах тухай, Иргэний хуульд нэмэлт, өөрчлөлт оруулах тухай, Хэвлэл мэдээллийн эрх чөлөөний тухай хуулийг дагаж мөрдөх журмын тухай хуулийн төслүүдийг хэлэлцэж байна. Төсөлд тусгаснаар сэтгүүлч эх сурвалжаа нууцлах эрхтэй, хэрвээ эх сурвалжаа хэлэхийг шаардаж шахалт үзүүлбэл, тухайн этгээдэд хариуцлага хүлээлгэнэ. Мөн хэвлэл мэдээллийн хэрэгслийн эздийг тодорхой болгох шаардлага тавьсны зэрэгцээ үндэсний аюулгүй байдалд нөлөөлөх, олон нийтийг гэмт хэрэг өдөөн хатгалагт уриалан дуудсан мэдээ, мэдээлэл цацахыг хориглосон гээд олон чимхлүүр заалтууд тусгаад буй юм. Түүнчлэн сэтгүүлч, хүний заяагдмал эрхэд халдаж болохгүй, энэ нөхцөлд хариуцлага хүлээхээр тусгаад байна. Хэлэлцүүлгийн шатанд УИХ-ын гишүүн Ц.Сэдванчиг “Нэр нэг хоёр хуулийн төслийг бид хэлэлцэж байна. Ялгаа нь юундаа байна вэ. Хоёрдугаарт, энэ төсөлд хэвлэл мэдээллийн хэрэгслийн эздийг ил болгоно гэж… Эздээс илүү хөрөнгө оруулагч талыг нь зарлах ёстой биш үү” гэсэн юм.

Үүнд Ерөнхийлөгчийн зөвлөх Ч.Сосормаа “Хоорондоо адил зүйл нэлээд бий. Гэхдээ ялгаатай зүйлүүд бий. Тухайлбал, энэ төсөлд захиалгат мэдээлэл нийтэлсэн нөхцөлд түүнийг нь тодорхой бичдэг. Сэтгүүлч эх сурвалжаа нууцлах, сэтгүүлчийн асуудлыг авч хэлэлцдэг консултай болох гээд олон ялгаатай асуудал бий” гэсэн юм.

Энэ асуудлыг хэлэлцэхийн өмнө чуулганаар Засгийн газраас өргөн мэдүүлсэн Хэвлэл мэдээллийн эрх чөлөөний тухай хуулийн төслийн шинэчилсэн найруулгын төслийг хэлэлцсэн. Хэлэлцүүлгийн шатанд УИХ-ын гишүүн Р.Гончигдорж “Сурвалжлагч бол зарц биш, чөлөөт сурвалжлагч байх ёстой. Түүний хэлсэн, бичсэн зүйлийг цензурдаж, энэ хүний ярилцлагыг гаргаж болохгүй. Энэ өгүүлбэрийг авах ёстой, ийм агуулгаар нийтлэл бичиж болохгүй гэх мэтээр редакциас нь тухайн сурвалжлагч, сэтгүүлчийн үйл ажиллагаанд халдаж болохгүй. Энэ бол сэтгүүлчийн эрх зүйг зөрчиж байгаа асуудал юм. Тиймээс хэвлэл мэдээллийн эрх чөлөөг хангасан хуулийг батлах ёстой тул энэ агуулга руу явах ёстой” гэсэн юм.

Ингээд хуулийн төслийг хэлэлцэх нь зүйтэй гэсэн саналын томъёоллоор гишүүдээс санал хураалгахад 74.9 хувь нь “Хэлэлцэх нь зүйтэй” хэмээн үзэж, анхны хэлэлцүүлэгт бэлтгүүлэхээр УИХ-ын Төрийн байгуулалтын байнгын хороонд шилжүүлсэн юм.