УИХ-ын чуулганы нэгдсэн хуралдаанаар Нийтийн албанд нийтийн болон хувийн сонирхлыг зохицуулах, сонирхлын зөрчлөөс урьдчилан сэргийлэх тухай, Авлигын эсрэг хуульд нэмэлт, өөрчлөлт оруулах тухай, Эрүүгийн хуульд нэмэлт оруулах тухай, Төрийн албаны тухай хуульд өөрчлөлт оруулах тухай хуулийн төслийн эцсийн хэлэлцүүлгийг хийж баталлаа. “Маш чухал хууль. Зөв сайхан хэрэгжүүлээрэй. Төрийн албан хаагчид сайн судлаарай. Амар гарахааргүй, олон жил ярьсан хууль батлагдлаа шүү” гэж УИХ-ын дарга Д.Дэмбэрэл хэлж байв.

Харин хууль хэрэгжүүлж эхлэх хугацааны талаар маргаан гарсан юм. Хуулийг баталсөн өдрөөс нь, эсвэл долдугаар сарын 15-наас хэрэгжүүлж эхлэх тухай санал хэлэлцүүлгийн явцад гарсан. Харин гишүүн Х.Тэмүүжин төрийн албан хаагчид хоёрдугаар сарын 15-нд Хөрөнгө орлогын мэдүүлгээ мэдүүлнэ. Тэр өдрөөс хуулийг мөрдөж эхэлье гэсэн ч уг санал Хууль зүйн байнгын хороогоор хэлэлцүүлэх явцад дэмжлэг аваагүй байсан тул хуульд тусгах боломжгүй болж долдугаар сарын 15-наас хэрэгжүүлэхээр болов.