Хөгжлийн төлөө хамтдаа. Энэ үгийг Дархан-Уул аймгийн багш нар хэлсэн юм. Гэхдээ зүгээр нэг хэлсэнгүй. Бүхэл бүтэн хөтөлбөр хэрэгжүүлж эхэлсэн. Санаачлагч багш нар баг, боловсрол хамтын ажиллагааны нийгэмлэг, МУИС, МУБИС, Дархан-Уул аймгийн боловсрол соёлын газар хамтран зохион байгуулсан юм. Мэдээж сургалтын хөтөлбөр хэдэн хоног үргэлжлээд дуусаагүй. Бүтэн жилийн хугацаанд хэрэгжих билээ. Хөтөлбөрийн гол зорилго нь багш нарын арга зүйд шинэчлэл хийж, мэргэжлийн ур чадварыг дээшлүүлэхэд оршиж байгаа юм.

Багш нар самбарын өмнө хичээлээ заагаад шавь нар сонсдог тэр байдлаас татгалзах цаг болсныг хэлж байгаа юм. Залуу зуун багшийн арга зүйд шинэчлэл хийх сургалт өнгөрсөн хугацаанд явагджээ. Долоон цэцэрлэгийн долоон багш “Эв-7 баг” нэртэйгээр сургалтад хамрагдаж, өнөөдөр юу сурч мэдсэнээ тайлагнаж байна. Цэцэрлэгийн ахлах ангийн хүүхдүүдэд тэгш болон сондгой тоог хэрхэн ялгаж, таних талаар тэд хичээлээ явуулсан. Цахим хэлбэрээр хүүхдүүдэд хүүхэлдэйн кино үзүүлснээс гадна заах аргадаа нэвтрүүлсэн харилцан ярианы арга, илтгэг тодруулах арга, тоглоомын, бүлгээр ажиллах, урамшуулах гээд хэд хэдэн аргыг хичээлдээ ашигласан юм.