Мэжэр лиг бэйсболын “Оакланд Атлетикс” болон “Сиэтл Маринерс” багууд ирэх гуравдугаар сард болох шинэ улирлын нээлтийн тоглолтоо Японд хийж, өнгөрсөн жил тус улсад тохиосон хүчтэй газар хөдлөлт, цунамид нэрвэгдсэн хүмүүст зориулах болжээ. Ийнхүү MLB түүхэндээ дөрөв дэх удаагаа Япон улсад улирлын нээлтээ хийх гэж байна. Дээр дурдсан хоёр баг Токио хотноо хоёр тоглолт хийх бөгөөд тоглолтоос олсон орлогыг цунами, газар хөдлөлтөд өртсөн хотуудын сэргээн босголтын ажилд хандивлах гэнэ.

“Оаклэнд Атлетикс” багийн хувьд хоёр дахь удаагаа улирлын нээлтийн тоглолтоо Японд хийх гэж байна. Өмнө нь тэд 2008 онд Токио хотноо “Бостон Рэд Сокс”-ын эсрэг тоглож байсан юм.