Дэвшилтэт, уян хатан системээр сургана. Энэ бол “Кембрижийн” хэмээх тодотголтой боловсролын олон улсын системийн тулгуур ойлголт. Боловсрол, соёл, шинжлэх ухааны яамнаас дунд сургуулиудад олон улсын стандарт бүхий Кембрижийн сургалтын системийг нэвтрүүлэх ажил өрнүүлж байгаа билээ. Энэ хүрээнд 2014 он хүртэлх хугацаанд орон даяар 30 сургууль болох үндэсний лаборатори сургуулиудад турших юм байна. Ингэхдээ нийслэлд арав, хөдөө орон нутгийн 21 сургуульд нэвтрүүлэх ажээ. Харин туршилтын эдгээр  сургуульд нэвтрүүлсэний дараа буюу 2014 оноос эхлэн орон даяар бусад сургуулиудын сургалтын системд Кембрижийн боловсролыг “нутагшуулах” гэнэ. Ийнхүү олон улсын стандартыг нэвтрүүлсэн хэмээн батлагдах он цаг бол 2018 он бөгөөд зохих шалгалтыг өгч магадлан итгэмжлэгдсэнээр олон улсад хүлээн зөвшөөрөгдсөн боловсрол эзэмшсэн  боловсон хүчин гарч ирнэ гэсэн үг юм.

Олон улсын стандартыг монголдоо нэвтрүүлэх энэхүү үйл хэргийн үр нөлөөгөөр монгол сурагчдын оюун ухааны цар хэмжээ гологдохгүй ч бодит байдал дээр боловсролын системээр хязгаарлагддаг харамсалтай асуудлыг арилгах гэнэ. Өөрөөр хэлбэл 12 жилийн тогтолцоот боловсролын чанар, өгөөжийг мэдэрсэн, практик дээр суурилсан чадварыг эзэмших ажээ. Монголд мэдлэг дээр суурилсан боловсон хүчин бэлтгэгдэн гарч байсан бол  олон улсад дадлага дээр суурилсан мэдлэгийг голчилдог байна. Чухам энэхүү тэргүүн туршлагыг нэвтрүүлэхээр МУИС,МУБИС, болон Боловсролын хүрээлэн хамтран, ажлын хэсгээр томилогдон ажиллаж байна. Одоогийн байдлаар нийслэлийн “Шинэ эрин”, “Шинэ эхлэл”, “Монгол тэмүүлэл” сургуулиуд англи монгол хоёр хэлээр сургалтаа явуулж байгаа бөгөөд Кембрижийн сургалтын системийг нэвтрүүлэн дадлага дээр тулгуурласан, хэрэгтэй хчиээлүүдээ өөрөө сонгодог тогтолцоог хэрэгжүүлж байгаа аж.

 “Шинэ эрин” лаборатори сургуульд хэрэгжих олон улсын боловсролыг түгээхэд хүчин зүтгэх багш нарын тухайд 2010 оны дөрөвдүгээр сонгогдсон бөгөөд тэдний мэргэжил дээшлүүлэх сургалт есдүгээр сард эхэлсэн байна. Ингэхдээ эхний ээлжинд дэлхийн өнцөг булан бүрээс манай улсын нэгэн адилаар Кембрижийн боловсролыг нэвтрүүлэх улс орны багш сурган хүмүүжүүлэгч нар онлайнаар сургалтандаа сууж, түүний дараагаар Монголын сургагч багш нар Бээжинд сургалтанд сууж, эрхээ авсан байна. Үүнээс хоёр сарын дараа хүүхдүүдийг сургах ажил эхэлжээ. Ингэснээр монгол, англи хэл дээр боловсрол эзэмшин, хосмог сертификаттай, олон улсад хүлээн зөвшөөрөгдөх боловсролтой төгсөх гэнэ.