Дархан-Уул аймгийн Засаг дарга өнгөрсөн онд аймгийн нийгэм, эдийн засгийг хөгжүүлэх хөтөлбөрт зургаан бүлэг, 117 зорилт 299 ажил төлөвлөгдсөн аж. 2011 оны жилийн эцсийн байдлаар хэрэгжилт 93 хувийн биелэлттэй байна гэдгийг ЗДТГ-ын дарга Т.Ганболд хэлэв. Энэ хэр үнэн вэ? Өнөөдөр Дарханы 8000 цэцэрлэгийн насны хүүхдийн ердөө 3000 нь л цэцэрлэгт хүмүүжиж байна. Засаг дарга та мөрийн хөтөлбөртөө “Дархан суманд сургууль, цэцэрлэгийн цогцолбор нэг, цэцэрлэг хоёрыг шинээр барьснаар Сургуулийн өмнөх бага боловсролын хамран сургалт 73 хувь, бага боловсролын хамран сургалт 99.7 хувьд хүрнэ” гэж тусгажээ. Энэ биеллээ олсон уу? Үүнээс гадна “2012 он хүртэл боловсрол, соёлын байгууллагын албан хаагчид орон сууцжуулах хөтөлбөрт хамрагдана” гэсэн хэдий ч энэ оноос л орон сууц хөтөлбөрөө хэрэгжүүлэх гэж байна. Хэзээ багш нар байртай болов вэ гэдгийг мөн асуумаар байна. “Дархан-Их сургууль” цогцолбор байгуулагдана”. Энэ мөн л таны мөрийн хөтөлбөр. Гэвч үнэн хэрэгтээ үлгэр болоод үлдсэн шүү дээ.

Нэгэн зүйл “Хөгжлийн бэрхшээлтэй иргэдэд үзүүлэх тусламж үйлчилгээ, халамж сайжирна. Эмзэг ба өртөмхий бүлгийн өвчлөл, нас баралт буурна” гэж мөрийн хөтөлбөртөө тусгажээ. Дарханд өнөөдөр хүний амь эрсэдсээр байна. Ялангуяа золгүй байдлаар нас барах явдал анхаарал татаж байгааг Аймгийн прокурор дурдаж байсан билээ. Мөн хөгжлийн бэрхшээлтэй гээд хараагүйчүүдийн салбар зөвлөлийн зохион байгуулж байгаа ажилд ямар ч дарга ирж оролцдоггүй. Тэднийг дэмждэггүй шүү дээ. Групп тогтоолгоход хүртэл ямар хэцүү байдгийг тэд хөгжлийн бэрхшээлтэй иргэдийн эрхийн өдрөөрөө хэлж суусан. Тэдэнд үзүүлэх үйлчилгээ, халамж нэмэгдсэнгүй. “Барилгын материалын үйлдвэрлэл 10 хувиар нэмэгдэж, шинэ нэрийн хоёр бүтээгдэхүүнтэй болно” гэжээ. Ямар шинэ бүтээгдэхүүнтэй болов. Юун үйлдвэрлэл нэмэгдэв? 40 мянган айлын орон сууц хөтөлбөрийн хүрээнд “Дархан сумын 1500 өрхийг орон сууцаар хангах боломж бүрдэнэ” гэсэн ч ердөө 200-хан айлын орон сууц ашиглалтанд орсон.

Мөрийн хөтөлбөрт “Газар зохион байгуулалт, ашиглалт сайжирна” гэжээ. Яаж сайжруулсан юм бэ. Өнөөдөр Дарханд хот төлөвлөлт гэж алга. Амины орон сууцны газрыг 17-р сургуулийн урд олгодог нь ямар учиртай юм бэ. Хотын А зэрэглэлийн гэж хэлж болохоор дэд бүтэцтэй газарт дөрвөн айлын хаус баригдсан байх юм. Энэ энгийн жишээ шүү дээ. “Газартай холбоотой мэдээлэл ил тод болно” гэсэн ч мөн л хангалтгүй. Хөрөнгө мөнгөгүй нь хөтөл хороололд газар авч байхад мөнгө төгрөгтэй бол төв зам дагуу газар авч байх жишээтэй. “Хот суурин газрууд дахь агаар, ус, хөрсний бохирдлыг тогтмол хянаж багасгах арга хэмжээ авна” гэсэ. Ямар арга хэмжээ авсан бэ. Дарханд агаар, хөрс, усны бохирдол жил ирэх тусам нэмэгдэж байгааг ард иргэд нь хэлж байна. Мөн “Дэвшилтэд технологийг ашиглан хот суурин газруудад хог хаягдлын шинэ менежментийг нэвтрүүлнэ” гэсэн нь эсрэгээрээ болж, Дархан хот өнөөдөр хогонд дарагдаад байна. Та “Малын хулгайн гэмт хэргийн илрүүлэлт сайжирч, гаралт буурна” гэсэн бол өнөөдөр Дарханд хулгайн гэмт хэрэг буурахгүй байна. Мөрийн хөтөлбөрийн биелэлт яг хэдэн хувьтай байна вэ?