Баянзүрх дүүргийн иргэд өнөөдөр тус дүүргийн Засаг дарга Б.Батзоригийг “Хууль зөрчиж байна” хэмээн эсэргүүцэж, дүүргийн ЗДТГ-ын байрны өмнө жагслаа. Тус дүүргийн зарим хороо 2008 оноос хойш өнөөг хүртэл Засаг даргаа томилж чадахгүй  улс төржиж байгаа талаар  жагсаалд оролцогчид хэллээ. Тэд мөн “БЗД-ийн Засаг дарга, дүүргийн МАН-ын дарга Б.Батзоригийг хорооны Засаг даргыг өөрийн хүмүүсээр дур мэдэн томилсоор удаж байгаа” гэв.

Тус дүүргийн иргэд “Иргэдийн нийтийн хурал /ИНХ/ хуралдуулахгүй байгааг хэдэнтээ шүүмжилсний дараа зарим хороод хурлаа хийсэн байна. Гэхдээ хуульд заасан хурал зарлах хугацаанд зарлаагүй, хурлын зарыг нийт иргэдэд бус зөвхөн МАН-ын гишүүдэд тараасан, хурлын товыг өөр өөр хугацаагаар зарлаж, иргэдийг төөрөгдүүлсэнд бухимдаж байгаа илэрхийлж, өнөөдрийн жагсаалыг зохион байгуулсан” хэмээн тайлбарлаж байна. Тэд мөн Иргэдийн нийтийн хурлын шийдвэрийг эсэргүүцэж, захиргааны хэргийн шүүхэд хандахаа мэдэгдлээ. Тэдний хэлснээр хууль бус томилгоогоор хорооны Засаг даргын суудалд очсон арваад хүн байдаг гэлээ.