Ардын намын удирд­ла­гууд Засгийн газарт орон гарсан сайд нарын оронд хэнийг то­милох вэ гэд­гийг хэлэлцэж байгаа. Тэд байж болох ху­вил­барыг тооцоолж байна. Энэ нь “Салбарынхаа ажлыг сайн мэддэг хүмүүсийг сайд, дэд сайдаар томилох талаар ярьж байгаа” гэсэн үг л дээ. Харин нөгөө талаар тухайн албан тушаалд төдийлөн тохи­рохгүй, туршлага багатай,  залуу хү­мүүсийг томилж болох та­лаар ч хэлэлцжээ. Тэд­гээр хүмүүсийг сайд, дэд сай­даар томилсноор УИХ-ын 2012 оны сонгуулиар Ар­дын намын хийгээд тухайн хүний амжилтад нааштайгаар нө­лөөлөх учраас тэр гэнэ. Аль нэг яамны сайд, дэд сайдаар зургаан сарын хугацаанд ажил­лана гэдэг нь УИХ-ын 2012 оны сонгуульд нэр дэвшихээр горилж буй залуу улстөрчдийн нэр хүндэд тодорхой хэмжээ­гээр нөлөөлөх учиртай ажээ. УИХ-ын сонгуулиар “Би тэр яамны сайд, дэд сайдаар ажил­лаж байсан” гэвэл хүмүүс нааш­тайгаар хүлээж авна гэсэн үг юм уу даа. УИХ дахь Ардын намын бүлгийн ги­шүүд ч үүнийг нотолж “Өм­нө нь улс төрийн болон төрийн албан тушаал хашиж байгаагүй, залуу гишүүдээ гаргаж ирэх бодолтой байгаа гэсэн” гэж байна. Харин үүнийг дэмжихгүй байгаа нэг хэсэг нь “Удирдах зөвлөлөөс “Сонгуульд өрсөлдөхөөр го­рилж буй залуу улстөрчдөө сайдаар томилогдоход нь дэмж­лэг үзүүлье” гэж байсан. Шинээр томилогдсон сайд, дэд сайд нар зургаан сарын хуга­цаанд тухайн салбарын ажлыг хариуцна. Хэдий богино хугацаа ч улсын ажил явдгаараа явна. Орхигдуулж болохгүй” гэлээ. Ямар ч бай­сан Ардын на­мын­хан орон гарсан зургаан сай­дынхаа гур­выг УИХ дахь Ардын намын бүлгээс, гурвыг нь УИХ-ын гишүүн бус на­мын гишүүдээсээ сонгоё гэ­сэн шийдэлд хүрсэн ажээ. Ард­чилсан намынхан Зас­гийн газ­раас гарах өргөдлөө өгсөнтэй зэ­рэгцэн “Орон гарсан дэд сайд нарын оронд хүн то­милохгүй байвал яасан юм” гэлцэж эхэлсэн. Түүнчлэн УИХ-ын 2008 оны сонгуулийн үеэр Ард­чилсан намын даргад зориулан гар­гасан Тэргүүн шадар сайдын албан тушаалыг хэвээр үлдээх үү гэдэг нь шийдэлд хүрч чадахгүй бай­гаа асуудлын нэг. Тэргүүн шадар сайд, дэд сайд бол хамтарсан Засгийн газарт Ардчилсан нам, Ардын намын 40:60 гэсэн харьцааг хангах үүднээс гаргаж ирсэн албан тушаал. Нэг битгий хэл хоёр дэд сайдтай яам ч бий. Тиймээс “Байх шаардлагагүй. Улсын төсвийг ч тодорхой хэмнэнэ” гэж байгаа хэрэг. Гэхдээ энэ саналыг дэмжвэл одоо албан үүргээ гүйцэтгэж байгаа дэд сайдуудаа хэрхэх вэ гээд асуудал гарах учраас “Энэ удаад дэд сайдуудаа томилъё” гэж шийджээ. Монгол Улсын Ерөнхийлөгч Ц.Элбэг­дорж ч өнгөрсөн долоо хоногийн баа­сан гарагт Ардын намын дарга, Мон­гол Улсын Ерөнхий сайд С.Бат­болдтой уулзах үеэрээ Үндсэн хуульд заасны дагуу Засгийн газрын бү­тэц бүрэлдэхүүнийг Ерөнхий сайд, Ерөнхийлөгчтэй зөвшилцдөг гэд­гийг онцлоод Тэргүүн шадар сайд, дэд сайдуудын орон тоо шаард­лагагүй гэж үзэж байгаагаа хэл­сэн юм. Мөн сайд нарыг УИХ-аас биш, “гаднаас” томилбол зүгээр байгааг ч онцлов. Ерөнхий сайд түүний хэлсэн саналыг судалж, ажил хэрэг болгохоо амласан. Гэхдээ намын бодлого, үүсэх нөхцөл байдлыг бодсон ч тэр Ерөнхийлөгчийн саналыг хүлээн авах боломжгүй болжээ. Хэрвээ Тэргүүн шадар сайд, дэд сайд нарыг томилохгүй гэвэл Засгийн газрын тухай хуульд өөрчлөлт оруулах шаардлагатай болно. Нэг ёсондоо “бөөн ажил” ундарна гэсэн үг. Ардын намын Удирдах зөвлөлийн гишүүд ч “Хуульд өөрчлөлт оруулна гэвэл цаг их алдана. Түүний оронд орон гарсан сайд, дэд сайд нараа томилоод, ажлаа урагшлуулъя” гэсэн саналыг олонхиороо дэмжжээ. 

Тэргүүн шадар сайд, дэд сайд на­рыг шинээр томилох эсэхийг ийнхүү эцэслэн шийдээгүй байна. Гэсэн ч Ч.Улаан, Н.Энхболд, Ө.Энхтүвшин нарын нэгийг Тэргүүн шадар сайдаар томилох талаар Ардын намын удирд­лагууд ярьж байгаа ажээ. Ч.Улаан гишүүний хувьд “Засгийн газарт Сангийн сайдаар л ажиллавал ажиллана” гэж байна. Н.Алтан­хуягт зориулан гаргасан Тэргүүн шадар сайд хэмээх албан тушаалыг Ардчилсан намынхантай хамт үдэж ч мэднэ.

Харин орон гарсан таван яамны сайдаар томилогдох магад­лалтай хүмүүсийн нэрс тодорчээ. Ардчилсан намынхан Засгийн газраас гарах гэж байгаагаа мэдэгдсэний мар­гаашаас “Эрүүл мэндийн сайдаар Д.Очир­батыг, Байгаль орчин, аялал жуулч­лалын сайдаар Э.Мөнх-Очирыг томилно” гэх мэдээлэл гарсан. Нам нь энэ эрхэмүүдийг сайдаар томилохоор шийдсэндээ бус эрхэм гишүүд өөрсдөө энэ албан тушаалд очих хүсэлтэй байсан учраас л дээрх мэдээлэл гарсан хэрэг.

Үүнээс гадна УИХ-ын гишүүн Д.Загджав Батлан хамгаалахын сайд, Д.Арвин Байгаль орчин, аялал жуулчлалын сайд болохоор санаархаж, намын удирдлагууддаа энэхүү хүсэлтээ уламжилж байгаа ажээ. Гэхдээ батлан хамгаалах, цэрэг, цагдаагийн асуудлаас хол Д.Загджавт энэ салбарыг хариуцуулж байснаас аав, ээж нь цэргийнх байсан, өөрөө офицер цолтой Д.Арвин Батлан хамгаалахын сайд болсон нь хамаагүй дээр санагдана. Батлан хамгаалахын сайдаар нэрийг нь ярьж байгаа хүмүүсийн нэг нь УИХ-ын гишүүн Ж.Энхбаяр. Гэсэн ч тэрбээр өөрөө сайд болох хүсэлгүй байгаа гэнэ. Тиймээс Ардын намын удирдлагууд УИХ-ын гишүүн Д.Лүндээжанцан, Х.Жекей нарын нэгийг Батлан хамгаалахын сайдаар томилуулахаар тохиролцож байгаа ажээ.

Харин Сангийн сайдаар Засгийн газрын Хэрэг эрхлэх газрын дарга, УИХ-ын гишүүн Ч.Хүрэлбаатарыг, Зам, тээвэр, барилга хот байгуулалтын сайдаар Ардын намын нарийн бичгийн дарга Я.Содбаатарыг, Байгаль ор­чин, аялал жуулчлалын сайдаар УИХ-ын гишүүн Д.Оюунхоролыг томилуулахаар хэлэлцжээ. Хэрвээ Ч.Хүрэлбаатар Сангийн сайд бол­чихбол түүний ажлыг Ерөнхий сай­дын зөвлөхөөр ажиллаад удаагүй байгаа Гадаад харилцааны яамны Төрийн нарийн бичгийн дарга асан Д.Цогтбаатар авна. Зам, тээвэр, ба­рилга, хот байгуулалтын сайдаар сонгож болох дараагийн хувилбар нь УИХ-ын гишүүн Ц.Цэнгэл, Авто замын газрын дарга асан Б.Цэнгэл нар. Мөн Эрүүл мэндийн сайдаар тус яамны Төрийн нарийн бичгийн дарга Н.Хүрэлбаатарыг томилох бо­долтой байгаа гэнэ. Хэрвээ Б.Цэн­гэл, Н.Хүрэлбаатар нарыг сайдаар то­милуулахаар болбол “Орон гарсан сайд нарын тал хувийг УИХ-ын гаднах хүмүүсээс сонгоно” гэсэн ам­лалт нь биелэх нь. Тэднээс гадна Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн дарга Т.Гантулгыг Байгаль орчин, аялал жуулчлалын сайд бо­лох магадлалтай хүмүүсийн тоонд оруулсан аж. Тэр­бээр өмнө нь тус яамны Төрийн нарийн бич­гийн даргаар ажиллаж байсан юм. Ардын намын удирдлагууд сай­даар томилуулах хүсэлтэй байгаа хү­мүүсийн нэрсийг энэ долоо хоно­гийн пүрэв гарагт болох УИХ-ын нэгдсэн чуулганы хуралдаанаар хэлэл­цүүлж, батлуулах бодолтой байгаа аж. Тиймээс өнөөдөр болох Ардын намын бүлгийн хуралдаанаар сайдаар томилуулах хүмүүсийнхээ нэрийг хэлэлцүүлэх бололтой.