Үндэсний статистикийн хорооноос өнгөрсөн баасан гаригт сар бүр тогтмол гаргадаг нийгэм, эдийн засгийн төлөв байдлын талаарх мэдээллээ танилцууллаа. Энэхүү мэдээллээр инфляци 2011 оны арванхоёрдугаар сард өмнөх сарынхаа хоёр хувь, харин өмнөх оны мөн үеийнхээс 10.2 хувиар өссөн үзүүлэлттэй гарчээ. Жирийн иргэдийн тэр дундаа амьдралын баталгаажих төвшнөөс доогуур орлоготой өрхүүдийн амьжиргааг туйлдуулж буй энэхүү инфляци өсөхөд хүнсний бараа, усны бүлгийн дүн өмнөх сарынхаас 3.8 хувиар өссөн нь голлон нөлөөлсөн гэж статистикчид үзэж байна. Гэхдээ шинэ он гарсан даруйд нефтийн бүтээгдэхүүний үнэ литр тутамдаа 220-280 төгрөгөөр өссөн нь зөвхөн хүнсний бүтээгдэхүүнээр тогтохгүй бусад бараа бүтээгдэхүүний үнийг хөөрөгдөх шалтгаан үүсгэсэн тул нэгдүгээр сард инфляци өнгөрсөн оны арванхоёрдугаар сарынхаас ч өндөр гарах төлөвтэй аж.

Тэгвэл банкны салбартай холбоотойгоор гаргасан зарим мэдээллийг авч үзвэл  мөнгөний нийлүүлэлт 2011 оны эцэст 6427.2 тэрбум төг болж, өмнөх сарынхаас 304.0 тэрбум төг буюу 5.0 хувь, өмнөх оныхоос 1747.2 тэрбум төг буюу 37.3 хувиар өсчээ.

Гүйлгээнд байгаа бэлэн мөнгө 2011 оны эцэст 713.4 тэрбум төг болж, өмнөх сарынхаас 34.4 тэрбум төг буюу 5.1 хувь, өмнөх оныхоос 193.7 тэрбум төг буюу 37.3 хувиар өссөн байна. Аж ахуйн нэгж, байгууллага, иргэдэд олгосон нийт зээлийн өрийн үлдэгдэл 2011 оны эцэст 5641.1 тэрбум төг болж, өмнөх сарынхаас 202.4 тэрбум төг буюу 3.7 хувь, өмнөх оныхоос 2376.4 тэрбум төг буюу 72.8 хувиар өсчээ. Хугацаа хэтэрсэн зээлийн өрийн үлдэгдэл 2011 оны эцэст 73.7 тэрбум төг болж, өмнөх сарынхаас 2.2 тэрбум төг буюу 3.1 хувиар өсч, өмнөх оныхоос 16.9 тэрбум төг буюу 18.7 хувиар буурчээ.

Банкны системийн хэмжээгээр чанаргүй зээл 2011 оны эцэст 330.0 тэрбум төг болж, өмнөх сарынхаас 13.2 тэрбум төг буюу 3.8 хувь, өмнөх оныхоос 44.4 тэрбум төг буюу 11.9 хувиар буурсан байна.