Дундговь аймаг 540 сая төгрөгийн өртгөөр амбулаторийн шинэ барилгатай болж, ашиглалтад хүлээж аваад байгаа билээ. Шинэ эмнэлэг үүдээ нээхдээ “товлолт цагийн” гэх шинэ үйлчилгээг иргэдэд үзүүлж эхэллээ. Иргэд эмчид үзүүлэх цагаа урьдчилан авах ёстой. Өөрөөр хэлбэл амбулаторийн лавлах хэсэгт хандсанаар хэдэн цагт эмчид үзүүлэх бүртгэлийг авдаг болсон байна. Лавлах хэсэг өглөө 08.00- 09.00 цагийн хооронд иргэдэд цагийн хуваарийг олгож, тэр хуваарийг эмч дотоод сүлжээгээр татан авч, нэрсийн дарааллаар өвчтнийг үзэх эмх цэгцтэй агаад соёлтой, шуурхай үйлчилгээг бий болгоод байна.

Тус Поликлиникийн эрхлэгч С.Эрдэнэбатаас энэхүү үйлчилгээний талаар

“Тав тухтай орчин нөхцөл нэгэнт бүрдсэн учраас орчин үеийн эмнэлгийн чанар стандарт бүхий соёлч үйлчилгээг бид мөрдөж ажиллах ёстой. Тиймээс товлолт цагийн үйлчилгээг нэвтрүүлж байна. Урьд нь бид өвчтөнд төдийлөн хангалттай цаг гаргаж, тухтай үзэж зөвлөгөө өгч чаддаггүй байсан. Яагаад гэвэл гадаа үүдэнд хүмүүсийн урт дараалал үүсчихдэг байсан учраас тэр олон хүнийг үзэхийн тулд эмч өвчтөнд цаг гаргана гэдэг тун бэрх байсан л даа. Одоо бид тэр байдлыг халж байна. Нэг өвчтөнд 15-20 минут зарцуулж, өдөрт нэг эмч 20-25 иргэнийг хүлээн авна. Ингээд үзэхэд манай амбулаторын 14 тасаг өдөрт 280- 300 хүнд үзлэг оношлогоо хийх бүрэн боломжтой болж байгаа” хэмээв.