Засгийн газрын ээлжит бус хуралдааныг өнөөдөр 10.00 цагт зарласан ч анхны Үндсэн хууль баталсны 20 жилийн ойн хүрээнд Сүхбаатарын хөшөөнд цэцэг өргөх ёслол болсон мөн дараа нь хүндэтгэлийн чуулган болсонтой холбоотойгоор хойшлуулжээ. Учир нь дээрх арга хэмжээнүүдэд Монгол Улсын Ерөнхий сайд болоод бусад сайд нар оролцох зайлшгүй шаардлагатай болсон аж. Тиймээс Засгийн газрын ээлжит бус хуралдааныг 14.00 цагт зарлахаар шийджээ.

Тус хуралдаанаар нефтийн бүтээгдэхүүний үнийн хөөрөгдөлтэй холбоотой асуудлыг авч хэлэлцэн, холбогдох албан тушаалтнуудад хариуцлага тооцох асуудлыг авч хэлэлцэх юм. Эх сурвалжаас авсан мэдээллээр бол нефть импортлогч компаниуд өчигдрөөс эхлэн авто бензинээ литр тутамд нь 50 төгрөгөөр буулгасан ч түүнээс ч илүү үнээр буулгах боломжтойг Шударга өрсөлдөөн хэрэглэгчийн төлөө газраас гаргасан юм байна. Тиймээс энэ асуудал ч ээлжит бус хуралдаанаар хөндөгдөх бололтой.