Дулам гэдэг овгоосоо илүүтэй Төрийн өмчийн хороогоор овоглох болсон Д.Сугар өөрийн хүсэлтээр ажлаа өгөхөөр болжээ. Мэдээж Засгийн газар уухайн тас хүсэлтийг нь ёсоор болгож гэнэ. Үе, үеийн Засгийн газарт тэсэж үлдсээр “хадаас” хочтой болтлоо ТӨХ-нд зүтгэсэн тэрбээр Хөгжлийн банкийг байгуулах үеэс л огцрох асуудал нь дуулиан тарьсаар, тэр бүхэн дээр тогтож үлдсээр байсан. Харин одоо цаг нь болсон гэж үзсэн бололтой. Түүний ажлаас чөлөөлөгдөх хүсэлт хүчинд автсаных уу, сонгуульд горилсных уу гэхчлэн олон талын эргэлзээ төрүүлэв. Манай улстөрчид өргөдлийг “өгүүлэхдээ” гаршсан болохоор тэр л дээ.

Ямартай ч өдий насанд сурч боловсоръё гэсэн шалтгаанаар “чөлөө” аваагүй нь лавтай. Харин “Эрүүл мэндийн шалтгаанаар өргөдлөө өгсөн” гэх таамаглал ортой байж мэднэ. Гэхдээ л “Эрдэнэс Оюутолгой” ХК-ийн халаа сэлгээтэй цаг хугацааны хувьд дэндүү ойр байгаа нь сэжигтэй бус уу. Уг нь Д.Сугарын хуульч мэргэжил, шударга зан чанар төрд хэрэгтэй “стратегийн ач холбогдолтой” боловсон хүчин гэдгийг нь харуулсаар ирсэн. Гэвч сонгууль ойртож, улстөржилт хүчирхэгжих тусам түүнд орон зай хомсдож буй нь зүйн хэрэг гэлтэй.

Нөгөөтэйгүүр тэрбээр маш олон ноцтой баримтын гэрч билээ. Тэгэхээр Д.Сугарын суудлыг суллах нь “Гэрчийг устгаснаас” ялгаа юу байх вэ. Юутай ч Д.Сугар Төрийн өмчийн хорооны даргын албанаас “уйдсан” бололтой.